Болаларга нисбатан зўравонликнинг олдини олишга оид илғор тажриба ўрганилди

Ҳуқуқни муҳофаза қилиш академияси вакили болаларга нисбатан зўравонликнинг олдини олиш юзасидан илғор хорижий тажрибани ўрганиш мақсадида Бола ҳуқуқлари бўйича Омбудсман раҳбарлигидаги идоралараро ишчи гуруҳи таркибида Финляндиянинг Хельсинки шаҳрида хизмат сафарида бўлиб қайтди.

Хизмат сафари давомида Финляндия давлатида вояга етмаганларга нисбатан жиноятларини, шу жумладан жинсий зўравонликнинг олдини олиш, фош этиш, тергов ҳаракатларини ўтказишнинг ўзига хос жиҳатларини ўрганиш билан бирга, болаларнинг ўзлари турли ижтимоий хавфли вазиятга тушиб қолганда ёхуд турли ҳуқуқбузарликларни содир этганда уларга комплекс тарзда кўмак бериш борасидаги чора-тадбирларга алоҳида эътибор қаратилди.

UNICEF маълумотларига кўра, Финляндия Европа давлатлари орасида болалар учун энг фаровон мамлакатлар қаторида Даниядан сўнг иккинчи ўринни эгаллаган.

Болаларнинг ҳуқуқ ва манфаатларини ҳимоя қилиш масаласида муҳим омил сифатида ҳукумат ва нодавлат ташкилотларининг ҳамкорликдаги тизимли фаолияти Финляндияда бу йўналишда ижобий натижаларга эришишда муҳим ўрин эгаллаган.