Прокуратура ва тергов органлари ходимларини тайёрлаш бўйича АҚШ тажрибаси ўрганилди

Прокуратура ва тергов органлари ходимларини замонавий талаблар асосида тайёрлаш, қайта тайёрлаш ва малакасини ошириш бўйича хорижий тажрибани ўрганиш ва амалиётга татбиқ қилиш мақсадида Ўзбекистон Республикаси Ҳуқуқни муҳофаза қилиш академияси вакилларининг АҚШга танишув ташрифи амалга оширилди.

Мазкур ташриф АҚШ Халқаро лидерлик ташрифлари дастурининг (IVLP) “Жиноятларни фош этиш ва тергов қилиш йўналишида самарали таълим дастурларини амалга ошириш бўйича Ҳуқуқни муҳофаза қилиш академиясининг салоҳиятини ошириш лойиҳаси” доирасида ташкил қилинди.

Ташриф давомида Академия вакиллари АҚШ ҳуқуқни муҳофаза қилувчи органлари фаолияти, шунингдек ҳуқуқшунос кадрларни тайёрлаш, қайта тайёрлаш ва малакасини ошириш бўйича олий ўқув юртлари ва муассасалари, марказлари, тегишли идораларининг тажрибаси, таълим жараёни ҳамда ўқув дастурлари, яратилган шароитлари ва инфраструктураси билан яқиндан танишиш имкониятига эга бўлишди.

Хусусан хизмат сафари доирасида Вашингтон, Сент-Луис, Пенсакола, Бостон ва Нью-Йоркда жойлашган суд, прокуратура, полиция, адвокатура, ҳуқуқни муҳофаза қилувчи органлар департаменти, суд криминалистикаси ва экспертиза марказлари, ҳокимият идоралари, прокуратура органлари ходимларининг малакасини ошириш миллий ассоциацияси, Федерал тергов бюроси Кибержиноятларга қарши курашиш департаменти, АҚШ Адлия департаментининг прокурор кадрларни тайёрлаш, ўқитиш ва уларга кўмак бериш халқаро дастури бўлими фаолияти яқиндан ўрганилиб, жиноятчиликка қарши курашиш бўйича янги чақириқларни инобатга олган ҳолда ходимларнинг билим, малака ва кўникмаларини ошириш юзасидан ўзаро тажриба алмашинилди.

Шунингдек, Академия вакиллари учун нуфузли Вашингтон университети, Бостон ҳуқуқ мактаби, Бостон полиция академияси, Шимоли-шарқий университет, Вебстер университети, Нью-Йорк шаҳар университетининг жиноий одил судлов бўйича Жон Жей коллежида учрашувлар ташкил қилиниб, таълим йўналишида ўзаро ҳамкорлик қилиш келишувларига эришилди.