Бюджет даромадлари базасини кенгайтириш ва қўшимча захираларни аниқлаш масалаларига бағишланган махсус курслар ўтказилди

Бош прокуратура Академиясида жорий йилнинг 6-15 ноябрь кунлари давлат солиқ хизмати органлари ходимларининг бюджет даромадлари базасини кенгайтириш ва қўшимча захираларни аниқлаш борасидаги кўникмаларини шакллантириш бўйича махсус курслар ўтказилди. Тадбирда Тошкент шаҳри туманлари давлат солиқ инспекцияларининг 958 нафар ходимлари иштирок этди. Курслар икки кунлик кечки таълим шаклида ўтказилди.

Ўқув жараёнида Ўзбекистон Республикасининг солиқ сиёсатини такомиллаштириш концепциясидан келиб чиқадиган вазифалар, солиқ сиёсатида назарда тутилаётган ўзгаришлар, шу жумладан умумбелгиланган солиқ тизимига ўтказишни тартибга солиш масалаларига атрофлича тўхталиб ўтилди.

Ўқув курслари давомида солиқ маъмуриятчилиги ва назоратида коррупция омилларининг олдини олиш ва уларга барҳам бериш, солиқ тўловчиларни тўлиқ паспортлаштириш, ишчилар сони ва иш ҳақини легаллаштириш юзасидан тизимли ишларни амалга ошириш бўйича тегишли тавсия ва кўрсатмалар берилди.

Иштирокчилар ўзларини қизиқтирган саволларга батафсил жавоб олдилар.