“Ҳозирги замон илмий-тадқиқот ишларига қўйилган талаблар” мавзусида илмий семинар ўтказилди

Академияда навбатдаги “Фан соати” доирасида Ўзбекистон Республикаси Олий аттестация комиссияси эксперти, Ўзбекистон Республикаси Жамоат хавфсизлиги университети профессори, ю.ф.д., проф. Рўзиев Рустам Джаббарович томонидан “Ҳозирги замон илмий тадқиқот ишларига қўйилган талаблар” мавзусида илмий семинар бўлиб ўтди.

Тадбирдан мақсад Ўзбекистон Республикасида илмий тадқиқотларнинг сифати ва самарадорлигини ошириш, ёш олимлар ҳамда тадқиқотчиларни халқаро стандартларга мувофиқ илмий фаолиятга йўналтиришдан иборат.

Ушбу илмий тадбирда Академия профессор-ўқитувчилари, Судьялар олий мактаби, Давлат ва ҳуқуқ институти, Тошкент давлат юридик университети, Инсон ҳуқуқлари бўйича Миллий маркази, Жамоат хавфсизлиги университети, Ички ишлар вазирлиги академияси ва бошқа қатор илмий ҳамма олий таълим муассасаси илмий ходимлари, докторантлар ва соҳа мутахассислари иштирок этдилар.

Семинар давомида профессор Р.Рўзиев ҳозирги замон илмий тадқиқотларига қўйилаётган халқаро ва миллий талаблар ҳақида атрофлича маълумот бериб, илмий ишларни тайёрлаш методологияси, тадқиқотнинг илмий ва амалий аҳамиятини ошириш йўналишлари ҳамда илмий ахлоқ қоидалари ҳақида фикр билдирди.

Тадбирда иштирок этган профессорлар О.Окюлов, Ф.Отахонов, Х.Исанов ва М.Мамасиддиқов илмий фаолиятда сунъий интеллектдан фойдаланишнинг долзарб масалаларига тўхталиб, унинг илмий тадқиқотларнинг самарадорлигини ошириш, ахборотга кириш имкониятларини кенгайтириш, вақтни тежаш, тадқиқот ишининг кучли ва заиф томонларини аниқлаш борасидаги афзалликлари билан бирга махфийлик ва муаллифлик ҳуқуқларини бузиш, маълумотларнинг ҳаққонийлиги, илмий этика қоидаларининг бузилиши, академик ҳалоллик билан боғлиқ муаммолар мавжудлигини қайд этиб ўтишди.

Иштирокчилар ўзларини қизиқтирган саволлар билан мурожаат қилишди ва амалий тавсиялар олдилар.

Тадбир сўнгида профессор Р.Рўзиев илмий изланишларда муваффақият қозониш учун пухта режалаштириш, замонавий ахборот технологияларидан фойдаланиш ҳамда инновацион ёндашувларни қўллашнинг аҳамиятини алоҳида таъкидлаган ҳолда Академияда ташкил этилаётган “Фан соатлари” илмий жамоатчилик ўртасида ижобий баҳоланаётганлигини, унинг ҳақиқий илмий ходимлар кўникмаларини шакллантиришга хизмат қилиб келаётганлигини, турли юридик таълим ва тадқиқот муассасалари илмий ходимлари учун керакли “илмий майдон” вазифасини бажараётганлигини эътироф этди.