Академияда Маҳмудхўжа Беҳбудий таваллудининг 150-йиллигига бағишланган тадбир бўлиб ўтди

Бугун Ҳуқуқни муҳофаза қилиш академиясида Бош прокуратура вакиллари билан биргаликда буюк маърифатпарвар, мутафаккир ва Марказий Осиёда жадидчилик асосчиларидан бири Маҳмудхўжа Беҳбудий таваллудининг 150 йиллигига бағишланган тантанали тадбир бўлиб ўтди.

Маҳмудхўжа Беҳбудий маърифат ва ижтимоий тараққиётга интилиш тимсолига айланди. Унинг таълим соҳасидаги ислоҳотлар, маданиятни ривожлантириш ва фуқаролар ўртасида ҳуқуқий онгни юксалтириш борасидаги ғоялари бугунги кунда ҳам ўз долзарблигини сақлаб қолмоқда.

Тадбирда Ҳуқуқни муҳофаза қилиш академияси ва Бош прокуратура раҳбарияти вакиллари сўзга чиқиб, Беҳбудий меросининг ҳуқуқий маданиятни шакллантириш ва янги авлодни тарбиялашдаги аҳамиятини таъкидладилар. Буюк маърифатпарвар биографияси ва фаолиятининг асосий жиҳатлари ҳамда унинг жамият тараққиётига қўшган ҳиссаси ёритилган.

Талабаларда мамлакатнинг ҳуқуқий келажаги учун масъулият ҳиссини тарбиялаш мавзусига алоҳида эътибор қаратилди. Иштирокчилар Маҳмудхўжа Беҳбудийнинг адолатли ва маърифатли жамиятни шакллантиришга қаратилган ғоялари ҳуқуқий таълимга замонавий ёндашувларда ўз аксини топаётганини таъкидладилар.

Тадбир доирасида Маҳмудхўжа Беҳбудий ҳаёти ва фаолиятига бағишланган ҳужжатли  фильм намойиши бўлиб ўтди.

Учрашув якунида Ҳуқуқни муҳофаза қилиш академияси талабалари ва прокуратура ходимлари мунозараларда иштирок этиб, Беҳбудий ғояларининг одил судлов ва таълим тизими олдида турган замонавий муаммолар контекстида долзарблигини муҳокама қилдилар.

Тадбир таълим ва ҳуқуқни муҳофаза қилиш тузилмаларининг тарихий хотирани асраш, ҳуқуқий онгни мустаҳкамлаш ва миллий қадриятларни тарғиб қилиш борасидаги ҳамкорлигининг ёрқин намунаси бўлди.

Шуни алоҳида таъкидлаш жоизки, Ҳуқуқни муҳофаза қилиш академиясида шунга ўҳшаш тадбирлар мунтазам ўтказиб келинмоқда.