Ҳудудларда криминоген вазиятни илмий ёндашув асосида ўрганиш ишлари

Жиноятларни унинг турлари кесимида таҳлил қилиш, ҳуқуқбузарликлар профилактикаси ва жиноятчиликка қарши курашиш фаолиятини услубий ва консультатив таъминлаш Ўзбекистон Республикаси Ҳуқуқни муҳофаза қилиш академияси фаолиятининг асосий йўналишларидан биридир.

Мазкур йўналишда Академия томонидан тизимли ишлар амалга оширилиб, республикамиз ҳудудларида ўрганиш ишлари олиб борилмоқда.

Ҳуқуқни муҳофаза қилиш академияси бошлиғининг биринчи ўринбосари Е.В.Коленко бошчилигида Академиянинг бир гуруҳ ходимлари томонидан Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ПҚ–1-сонли Қарори ижросини таъминлаш мақсадида Қашқадарё вилоятига хизмат сафари ташкил этилди.

Ҳудудларда ҳуқуқни муҳофаза қилиш органлари ходимлари, “маҳалла еттилиги”, жамоатчилик вакиллари иштирокида мазкур қарор мазмун-моҳияти атрофлича тушунтирилди.

Академия вакиллари томонидан ишчи гуруҳлар таркибида вилоят маҳаллаларидаги криминоген вазият, содир этилган жиноятларнинг асл сабаблари, омиллари ва шарт-шароитлари бевосита жойига чиқилган ҳолда илмий ёндашув асосида ўрганиш ишлари олиб борилди. Қашқадарё вилояти ҳудудларида жиноятчиликка қарши курашиш, ҳуқуқбузарликлар профилактикаси, жамоат тартибини сақлаш ва аҳоли тинчлигини таъминлашда амалга оширилаётган ишлар билан бевосита танишилди.

Ўрганиш натижалари юзасидан бошланғич хулосалар умумлаштирилди ва таҳлиллар натижасида маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш соҳасига оид фаолиятни такомиллаштириш, бу борада идоралараро ҳамкорликни ривожлантириш, мавжуд академик ва илмий ишланмалар хулосаларини амалиётга татбиқ этиш юзасидан таклиф-тавсиялар ишлаб чиқилади.