БМТнинг Гиёҳвандлик ва жиноятчилик бўйича бошқармаси минтақавий ваколатхонаси раҳбари О. Штольпе бошчилигидаги делегация билан учрашув

2025 йил 18 феврал куни БМТнинг Гиёҳвандлик ва жиноятчилик бўйича бошқармаси (UNODC) Минтақавий ваколатхонаси раҳбари О. Штольпе бошчилигидаги делегация Ўзбекистон Республикаси Ҳуқуқни муҳофаза қилиш академиясига ташриф буюрди.

Учрашув давомида томонлар UNODC билан ҳамкорлик истиқболларини муҳокама қилиб, коррупцияга қарши кураш, жиноятчиликнинг олдини олиш ва унинг профилактикаси, жиноий активларни қайтариш, рақамли далиллар, суд экспертизаси ҳамда кибержиноятларга қарши курашиш соҳаларида ходимлар салоҳиятини ошириш, қўшма лойиҳаларни амалга ошириш ва шу йўналишда етакчи хорижий таълим ҳамда тадқиқот муассасалари билан ҳамкорлик алоқаларини йўлга қўйиш масалалари юзасидан фикр алмашдилар.

Шунингдек, учрашувда Ўзбекистон Республикаси Президентининг 2025 йил 3 январда қабул қилинган "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги ПҚ-1-сон қарорида белгиланган вазифалар доирасида жиноятчиликнинг олдини олиш ва ҳуқуқбузарликлар профилактикаси самарадорлигини ошириш бўйича ҳамкорликни ривожлантириш масалаларига алоҳида эътибор қаратилди.

Самарали ва мазмунли ўтган учрашув якунида томонлар белгиланган ташаббусларни амалга ошириш бўйича келгуси ҳамкорлик йўналишларини белгилаб олдилар.