Халқаро ҳуқуқ бўйича Philip C. Jessup International Law Moot Court Competition мусобақаси минтақавий саралаш босқичида иштирок этилди

Академия талабалари ва ўқитувчиларидан иборат жамоа Халқаро ҳуқуқшунос талабалар ассоциацияси (ILSA) томонидан Бишкек шаҳрида (Қирғизистон) ўтказилган “Phillip C. Jessup International Law Moot Court Competition” халқаро ҳуқуқ бўйича мусобақанинг минтақавий саралаш босқичида муносиб тарзда 3-ўринни қўлга киритди ҳамда “Phillip C. Jessup International Law Moot Court Competition Uzbekistan National Rounds Third Runner-up Team” соврини билан тақдирланди.

Марказий Осиё минтақаси бўйича саралаш босқичи Бишкекдаги Марказий Осиё Америка университетида бўлиб ўтди. Мусобақада ўн тўртта жамоа иштирок этди, жумладан, Қозоғистондан олтита, Ўзбекистон ва Қирғизистондан тўртта жамоа.

Миллий саралаш босқичида жамоалар ўз университетлари номидан қатнашиб, ёзма меморандумлар тайёрлаш ва оғзаки чиқишлар орқали баҳоланди. Иштирокчилар халқаро ҳуқуқнинг мураккаб масалаларини таҳлил қилиб, ечим топишди. Булар қаторига инсон ҳуқуқлари, ҳудудий низолар, қуролли тўқнашувлар ва халқаро гуманитар ҳуқуқ масалалари киради.

Мусобақа иштирокчиларнинг юридик таҳлил қилиш, далилларни асослаш ва омма олдида чиқиш кўникмаларини ривожлантиришга қаратилган. Шунингдек, Phillip C. Jessup мусобақасида қатнашиш ҳуқуқшунослик соҳаси талабаларига халқаро ҳуқуқнинг мураккаб масалаларини чуқур ўрганиш, нутқ маҳоратларини такомиллаштириш ҳамда жаҳон миқёсидаги мутахассислар ва тенгдошлари билан алоқа ўрнатиш имкониятини беради.