Ҳудудларда криминоген вазиятни илмий ёндашувлар асосида ўрганиш ишлари давом этмоқда

Ҳуқуқбузарликларнинг олдини олиш ва жиноятчиликка қарши курашиш фаолиятини методик ва консультатив таъминлаш Ўзбекистон Республикаси Ҳуқуқни муҳофаза қилиш академиясининг асосий йўналишларидан бири ҳисобланади.

Ушбу йўналишда Академия томонидан тизимли иш олиб борилмоқда, жумладан, ҳудудларга хизмат сафарлари ташкил этилмоқда.

Ўзбекистон Республикаси Президентининг 2025 йил 3 январдаги “2025 йилда мамлакат маҳаллаларида хавфсиз муҳитни яратиш ва ҳуқуқбузарликларнинг эрта олдини олиш тизимининг самарадорлигини ошириш чора-тадбирлари тўғрисида”ги ПФ–1-сон қарори ижросини таъминлаш мақсадида Ҳуқуқни муҳофаза қилиш академияси ходимларидан иборат гуруҳ Япониянинг халқаро ҳамкорлик агентлиги (JICA) эксперти билан ҳамкорликда Жиззах вилоятига хизмат сафари уюштирди.

Бевосита жойларга чиқилган ҳолда Академия ходимлари япон мутахассиси билан биргаликда илмий ёндашувлар асосида ҳудуддаги криминоген вазиятни ўрганиб, маҳаллаларда жиноятлар содир этилишига сабаб бўлувчи омиллар ва шароитларни аниқлаш бўйича иш олиб бордилар.

Муаммо долзарблигини инобатга олган ҳолда, вилоятда йўл ҳаракати хавфсизлигини таъминлаш билан боғлиқ масалаларни ўрганишга алоҳида эътибор қаратилди.