Бирламчи ихтисослашув шаклида касбий қайта тайёрлаш курси якунланди

Ҳуқуқни муҳофаза қилиш академиясида прокуратура органларига биринчи маротаба хизматга қабул қилинган ходимларни бирламчи ихтисослашув шаклида касбий қайта тайёрлаш курси ўқув машғулотлари якунланди.

Касбий қайта тайёрлаш курси прокурор-тергов иши ва прокуратура органларида иш юритишни ташкил қилиш асосларини ўқитишга йўналтирилган бўлиб, масофавий (электрон) ва Академияда анъанавий таълимдан иборат аралаш таълим шаклида ташкил этилди.

Касбий қайта тайёрлаш курси дастурида прокурор-тергов иши ва прокуратура органларида иш юритишни ташкил қилишнинг долзарб масалаларига оид касбий кўникмалар билан бир қаторда умумий кўникмаларни шакллантириш ва ривожлантиришга асосий эътибор қаратилди.

Курс тингловчилари қонунлар ижроси устидан прокурор назорати, жиноят ҳуқуқи ва процессининг долзарб муаммолари, суд ишларини юритишда прокурор ваколатини таъминлаш, прокуратура органларида ишларни ташкиллаштириш, мурожаатлар билан ишлаш ва иш юритиш, инсон ҳуқуқларига оид халқаро стандартлар, касб этикаси, нутқ маданияти, ходимнинг психологик компетентлиги ва бошқа модуллар доирасида мавзуларни ўзлаштирдилар.

Касбий қайта тайёрлаш курсининг якуний қисми бевосита Академияда анъанавий шаклда олиб борилди, унда ишдан ажралмаган ҳолда масофавий таълим жараёнида олинган билим ва кўникмалар мустаҳкамланди, якуний синовдан ўтган тингловчиларга касбий қайта тайёрлаш дипломлари топширилди.