Японияда ҳуқуқбузарликлар профилактикасининг асосий вазифалари ҳамда прокуратура органлари ходимларини тайёрлаш амалиёти

Жорий йилнинг 19 ноябрь куни Бош прокуратура Академиясида Япония Адлия вазирлиги масъул ходимлари Ито Хироюки, Ватанабэ Йошиката ҳамда Нагоя Университетининг Ўзбекистондаги ваколатхонаси вакиллари иштирокида амалий учрашув ва Японияда ҳуқуқбузарликлар профилактикасининг асосий вазифалари, прокуратура органлари ходимларини тайёрлаш амалиёти бўйича семинар-тренинг ўтказилди.

Амалий учрашув ва семинар-тренинг Япония давлатининг тегишли муассасалари билан ҳамкорликда прокуратура органлари ходимларини тайёрлашни янада ривожлантириш ҳамда Ўзбекистон Республикаси Президентининг 2018 йил 31 октябрдаги “Жиноий-ҳуқуқий статистика тизимини тубдан такомиллаштириш ва жиноятларни тизимли таҳлил қилиш самарадорлигини ошириш чора-тадбирлари тўғрисида”ги ПФ-5566-сонли Фармонига асосан жиноятларнинг содир этилиши сабабларини тизимли таҳлил қилиш ва ўрганиш бўйича Академия олдига қўйилган янги вазифаларнинг ижросини таъминлаш мақсадида ташкиллаштирилди.

Чет эллик мутахассислар Академия масъул ходимлари, профессор-ўқитувчилари ва тингловчиларига Японияда суд-ҳуқуқ тизими ва прокуратура фаолияти, кадрлар тайёрлаш масалалари, жиноятларни олдини олиш ва унга қарши курашиш механизмлари, жиноий-ҳуқуқий статистикани юритиш ва жиноятларни таҳлил қилиш жараёни, ҳуқуқбузарликлар профилактикаси юзасидан батафсил маълумот беришиб, ўз тажрибалари билан алмашишди.

Япония делегацияси вакиллари муҳокама қилинган масалалар бўйича келгусида Академия билан тажриба алмашиш ва ҳамкорликни йўлга қўйишга тайёр эканликларини билдириб ўтишди.