Илмий ёндашув асосида ҳудудларда криминоген вазиятни ўрганиш ишлари давом этмоқда

Ўзбекистон Республикаси Ҳуқуқни муҳофаза қилиш академияси фаолиятининг асосий йўналишларидан бири бўлган ҳуқуқбузарликларнинг олдини олиш ва жиноятчиликка қарши курашиш бўйича методик ва маслаҳат ёрдами кўрсатиш доирасида мамлакат ҳудудларида илмий ёндашувлар асосида криминоген муҳитни ўрганиш ишлари олиб борилмоқда.

Жорий йилнинг январь ойидан бошлаб Академия раҳбарияти ва ходимларидан иборат ишчи гуруҳ томонидан Ўзбекистон Республикаси Президентининг 2025 йил 3 январдаги ПҚ–1-сонли "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги қарори ижросини таъминлашга қаратилган тизимли ишлар олиб борилмоқда. Шу мақсадда, Академия мутахассислари ҳудудларга ташриф буюриб, криминоген вазиятга салбий таъсир кўрсатувчи омиллар, ҳуқуқбузарликларни келтириб чиқарувчи сабаблар ҳамда ҳар бир қизил ва сариқ тоифадаги маҳалладаги жиноятчилик динамикаси ва ҳудудий хусусиятлар ўртасидаги боғлиқликни таҳлил қилмоқда.

Таҳлиллар асосида энг кўп учрайдиган ҳуқуқбузарликларнинг барвақт олдини олишга қаратилган илмий асосланган хулосалар ва таклифлар ишлаб чиқилмоқда, шунингдек, тегишли услубий ва амалий қўлланмаларни тайёрлаш ишлари амалга оширилмоқда.