«Жиноят ишларини тергов қилишда замонавий ахборот технологияларидан фойдаланиш истиқболлари» давра суҳбати

Ўзбекистон Республикаси Ҳуқуқни муҳофаза қилиш академиясида “Жиноят ишларини тергов қилишда замонавий ахборот технологияларидан фойдаланиш истиқболлари” мавзусида давра суҳбати бўлиб ўтди. Тадбирда етакчи мутахассислар, олимлар, амалиётчи юристлар ва криминалист-экспертлар иштирок этди. Асосий эътибор жиноят-процессуал фаолиятни рақамлаштириш, сунъий интеллектдан фойдаланиш, суд экспертизасини ривожлантириш ва криминалистикада инновацион усулларни жорий этиш билан боғлиқ муаммоларга қаратилди.

Муҳокамалар давомида иштирокчилар рақамли технологияларни криминалистик амалиётга интеграция қилиш, халқаро стандартларга мувофиқ суд экспертизаси методологиясини яратиш ва янги илмий ёндашувларни ишлаб чиқиш имкониятларини кўриб чиқдилар. Шунингдек, рақамли далиллар билан ишлаш учун юқори малакали мутахассисларни тайёрлашнинг аҳамияти алоҳида таъкидланди. Замонавий техник воситалардан самарали фойдаланиш, жиноят далилларини аниқ ва холис таҳлил қилиш жараёнларини такомиллаштириш масалалари муҳокама қилинди.

Давра суҳбати натижалари экспертлар ҳамжамияти, олий таълим муассасалари ва ҳуқуқни муҳофаза қилиш органлари ўртасидаги ҳамкорликни кучайтириш учун стратегик йўналишларни ишлаб чиқишга хизмат қилади. Иштирокчилар томонидан криминалистика ва суд экспертизаси соҳасида халқаро ҳамкорликни кенгайтириш ҳамда рақамли технологиялар ёрдамида жиноятларни тергов қилиш усулларини такомиллаштиришга қаратилган қўшма илмий тадқиқот лойиҳаларини ишга тушириш таклифлари илгари сурилди.