«Jinoyat ishlarini tergov qilishda zamonaviy axborot texnologiyalaridan foydalanish istiqbollari» davra suhbati

O‘zbekiston Respublikasi Huquqni muhofaza qilish akademiyasida “Jinoyat ishlarini tergov qilishda zamonaviy axborot texnologiyalaridan foydalanish istiqbollari” mavzusida davra suhbati bo‘lib o‘tdi. Tadbirda yetakchi mutaxassislar, olimlar, amaliyotchi yuristlar va kriminalist-ekspertlar ishtirok etdi. Asosiy e’tibor jinoyat-protsessual faoliyatni raqamlashtirish, sun’iy intellektdan foydalanish, sud ekspertizasini rivojlantirish va kriminalistikada innovatsion usullarni joriy etish bilan bog‘liq muammolarga qaratildi.

Muhokamalar davomida ishtirokchilar raqamli texnologiyalarni kriminalistik amaliyotga integratsiya qilish, xalqaro standartlarga muvofiq sud ekspertizasi metodologiyasini yaratish va yangi ilmiy yondashuvlarni ishlab chiqish imkoniyatlarini ko‘rib chiqdilar. Shuningdek, raqamli dalillar bilan ishlash uchun yuqori malakali mutaxassislarni tayyorlashning ahamiyati alohida ta’kidlandi. Zamonaviy texnik vositalardan samarali foydalanish, jinoyat dalillarini aniq va xolis tahlil qilish jarayonlarini takomillashtirish masalalari muhokama qilindi.

Davra suhbati natijalari ekspertlar hamjamiyati, oliy ta’lim muassasalari va huquqni muhofaza qilish organlari o‘rtasidagi hamkorlikni kuchaytirish uchun strategik yo‘nalishlarni ishlab chiqishga xizmat qiladi. Ishtirokchilar tomonidan kriminalistika va sud ekspertizasi sohasida xalqaro hamkorlikni kengaytirish hamda raqamli texnologiyalar yordamida jinoyatlarni tergov qilish usullarini takomillashtirishga qaratilgan qo‘shma ilmiy tadqiqot loyihalarini ishga tushirish takliflari ilgari surildi.