Жиноятчилик содир этилиши сабабларини тизимли таҳлил қилиш бўйича Шайхонтоҳур тумани эксперт-таҳлил гуруҳининг биринчи йиғилиши бўлиб ўтди

Жорий йилнинг 21 ноябрь куни Шайхонтоҳур туман прокуратурасида туманда жиноятчилик содир этилиши сабабларини тизимли таҳлил қилиш эксперт-таҳлил гуруҳининг биринчи йиғилиши бўлиб ўтди.

Туман прокурори раҳбарлигидаги гуруҳ йиғилиши Ўзбекистон Республикаси Президентининг 2018 йил 31 октябрдаги “Жиноий-ҳуқуқий статистика тизимини тубдан такомиллаштириш ва жиноятларни тизимли таҳлил қилиш самарадорлигини ошириш чора-тадбирлари тўғрисида”ги ПФ-5566-сонли Фармонига асосан жиноятларнинг содир этилиши сабабларини тизимли таҳлил қилиш ва ўрганиш бўйича прокуратура органлари олдига қўйилган янги вазифаларнинг ижросини таъминлаш мақсадида ташкиллаштирилди.

Йиғилишда жамоатчилик асосида фаолият юритадиган туман эксперт-таҳлил гуруҳи таркибидаги прокуратура, ички ишлар, солиқ, соғлиқни сақлаш, бандлик ва меҳнат муносабатлари, таълим органлари, хотин-қизлар қўмитаси, ўзини-ўзи бошқариш органлари, “Нуроний” жамғармаси, Ёшлар иттифоқи вакиллари ҳамда таклиф қилинган Бош прокуратура Академияси, Ички ишлар органларида қонунчилик ижроси устидан назорат бошқармаси ва Тошкент шаҳар прокуратураси ходимлари иштирок этди.

Йиғилиш иштирокчилари тумандаги жиноятчилик ҳолатини муҳокама қилиб, жиноятларни олдини олиш ва унга қарши курашиш механизмлари, жиноий-ҳуқуқий статистикани юритиш ва жиноятларни таҳлил қилиш жараёни, ҳуқуқбузарликлар профилактикаси юзасидан батафсил маълумот олишди.

Бундан ташқари, эксперт-таҳлил гуруҳининг жиноятларни содир этилиши сабабларини тизимли таҳлил қилиш ва ўрганиш фаолиятини самарали олиб боришини таъминлаш мақсадида аниқ чора-тадбирлар ва вазифалар белгилаб олинди.