Илмий ёндашув асосида ҳудудларда криминоген вазиятни ўрганиш ишлари давом этмоқда

Ҳуқуқбузарликларнинг олдини олиш ва жиноятчиликка қарши курашиш бўйича методик ва маслаҳат ёрдами кўрсатиш Ўзбекистон Республикаси Ҳуқуқни муҳофаза қилиш академияси фаолиятининг асосий йўналишларидан бири бўлиб, мамлакат ҳудудларида илмий ёндашувлар асосида криминоген муҳитни ўрганиш ишлари тизимли давом эттириб келинмоқда.

Жорий йилнинг январь ойидан бошлаб Академия раҳбарияти бошчилигида тажрибали ходимларидан иборат ишчи гуруҳлар шакллантирилиб, улар томонидан Ўзбекистон Республикаси Президентининг 2025 йил 3 январдаги ПҚ–1-сонли "2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида"ги қарори ижросини таъминлашга қаратилган тизимли ишлар олиб борилмоқда.

Ишчи гуруҳлар бевосита ўзига бириктирилган ҳудудларда криминоген вазиятга салбий таъсир кўрсатувчи омиллар, ҳуқуқбузарликларни келтириб чиқарувчи сабаблар ҳамда ҳар бир қизил ва сариқ тоифадаги маҳалладаги жиноятчилик динамикаси ва ҳудудий хусусиятлар ўртасидаги боғлиқликни ўрганиб, таҳлил қилмоқда.

Таҳлиллар асосида энг кўп учрайдиган ҳуқуқбузарликларнинг барвақт олдини олишга қаратилган илмий асосланган хулосалар ва таклифлар ишлаб чиқилмоқда, шунингдек, тегишли услубий ва амалий қўлланмаларни тайёрлаш ишлари амалга оширилмоқда.