Ўзбекистон Республикаси Бош прокуратураси Академиясига 2018-2019 ўқув йили учун раҳбар кадрларни қайта тайёрлаш курсига қабул қилиш бўйича танлов ўтказилди

Ўзбекистон Республикаси Бош прокурорининг буйруғига мувофиқ, 12-22 ноябрь кунлари Бош прокуратура Академиясида раҳбар кадрларни қайта тайёрлаш курсига қабул қилиш учун танлов ташкил этилди.

Учта босқичдан иборат бўлган танловда 113 нафар прокуратура органларида раҳбарлик лавозимларини эгаллаш учун захирада турган кадрлар қатнашиш истагини билдирдилар.

Биринчи босқичда номзодларнинг билимларини аниқлаш мақсадида ҳуқуқнинг асосий 8 та соҳалари бўйича тест ўтказилди. Шунингдек, ушбу босқичда номзодлар психодиагностикадан ўтказилиб, уларнинг когнитив хусусиятлари,  шахслараро муносабатларга киришиш қобилиятлари, қийин вазиятларда хулқ-атвор услубини қўллаш каби зарур касбий, ахлоқий ва психологик сифатлари аниқланди.

Иккинчи босқичда ҳар бир номзод ўзи ишлаб турган прокуратура органининг соҳавий фаолиятини ривожлантириш бўйича таҳлил ишини шакллантирди ҳамда имтиҳон комиссияси олдида тақдимот шаклида ҳимоя қилди.

Учинчи босқич имтиҳон комиссияси томонидан якка тартибдаги суҳбат шаклида ўтказилди. Суҳбатда  номзодларга уларнинг ҳуқуқни қўллаш соҳасидаги ислоҳотлар ва замонавий тенденцияларни ҳамда прокуратура органлари тизими моҳиятини тушуниш даражасини, прокуратура органларида ишларни ташкиллаштириш ва бошқаришга оид билим ва амалий кўникмаларини ҳамда уларнинг тизимли таҳлил ва танқидий фикрлаш қобилиятларини аниқлашга доир, шунингдек, соҳага ва касбий хусусиятларга оид бошқа саволлар берилди.

Мазкур танловнинг ўтказилиши, номзодлар орасидан раҳбар кадрлар учун зарур бўлган бошқарув ва касбий компетенцияларига ҳамда қонунларга ва фуқароларнинг ҳуқуқ ва эркинликларига сўзсиз риоя этилиши юзасидан адолат ва масъулият, шахсий ва ишчанлик фазилатларига эга бўлган муносиб кадрларни танлаб олиш имконини берди.