Жиноий одил судловни амалга ошириш жараёнидаги коррупциявий хавф-хатарларнинг олдини олиш лойиҳаси бўйича экспертлик учрашув ўтказилди

Академияда Европа Иттифоқи ва Германия халқаро ҳамкорлик жамияти (GIZ) кўмагида амалга оширилаётган жиноий одил судловни таъминлаш жараёнида мавжуд бўлиши мумкин бўлган коррупциявий хавф-хатарларни аниқлаш ва олдини олишга қаратилган лойиҳа доирасида экспертлик учрашуви ўтказилди.

Учрашув давомида Академия раҳбарияти лойиҳани амалга ошираётган “Revanta B.V.” консалтинг компаниясининг жиноят ҳуқуқи ва коррупцияга қарши курашиш соҳасидаги халқаро даражадаги экспертлари Дмитро Котляр, Виталий Касько, Дмитрий Нурумов ва Сауле Орипова билан жиноий одил судловни амалга ошириш, хусусан терговга қадар текширув, жиноят ишини қўзғатиш, суриштирув ва дастлабки терговни амалга ошириш, айблов қувватлаш жараёнларида содир этилиши мумкин бўлган коррупциявий хавф-хатарлар, суиистеъмолчиликлар масаласида фикр алмашилди.

Экспертлик муҳокамалари давомида қайд этилган соҳаларни коррупциядан холи тизимга айлантириш мақсадида лойиҳани самарали ўтказиш, хавф-хатарларни баҳолаш услубиётини ва унинг асосида масъул ходимлар учун ўқув курсларини ишлаб чиқишда ҳамкорлик қилишга келишиб олинди.