Вилоятлар прокурорларининг биринчи ўринбосарлари учун махсус семинар ташкил этилди

Ҳуқуқни муҳофаза қилиш академиясида Қорақалпоғистон Республикаси, Тошкент шаҳар ва вилоятлар прокурорларининг биринчи ўринбосарлари иштирокида жиноятчилик ва коррупцияга қарши курашиш, маҳалла жиноятчилигини барвақт олдини олиш, энергетик хавфсизлигини таъминлаш ҳамда ижтимоий соҳаларда ноқонуний ҳолатларни жиловлаш фаолиятини ташкил этишга оид билим ва кўникмаларни ошириш бўйича семинар ўтказилди.

Семинар машғулотларида жиноятчиликка қарши курашишда криминоген вазиятни таҳлил қилиш, жиноятчиликнинг олдини олиш бўйича илмий асосланган таклифлар ишлаб чиқиб, амалиётга жорий этиш, маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш масалалари атрофлича муҳокама қилинди.

Шунингдек, жиноят ҳуқуқининг долзарб муаммолари, коррупциянинг янги, рақамли кўринишлари, жумладан кибер коррупцияга қарши самарали курашиш бўйича мустаҳкам ҳуқуқий база яратиш борасида ўзаро фикр алмашилди.

Иштирокчилар Академияда ташкил этилган Рақамли криминалистика илмий-тадқиқот институти фаолиятига оид тақдимот билан танишдилар.

Бундан ташқари, ҳуқуқни муҳофаза қилиш органлари учун кадрлар тайёрлаш, қайта тайёрлаш ва уларнинг малакасини ошириш юзасидан Академияда жорий этилган таълим дастурлари, шунингдек, киберлаборатория, криминалистик полигон, криминалистик лаборатория, суд имитацияси зали ҳамда бошқа амалий ва симуляцион ўқув машғулотларини ўтказиш имконини берадиган замонавий таълим инфратузилмаси прокурорларда катта қизиқиш уйғотди.

Семинар доирасида иштирокчилар шунингдек Тошкент шаҳар ИИББда ташкил этилган Ситуацион марказ ва Тошкент вилояти ИИББнинг Тезкор-бошқарув маркази имкониятлари, Тошкент вилояти Ўртачирчиқ туманидаги Маҳалла ҳуқуқ-тартибот маскани фаолияти билан танишдилар.