Тан жароҳати етказиш жиноятларининг профилактикаси самарадорлигини ошириш масалалари муҳокама қилинди

Ҳуқуқни муҳофаза қилиш академиясида Криминология тадқиқот институти билан ҳамкорликда “Тан жароҳати етказиш жиноятларининг профилактикаси самарадорлигини ошириш масалалари” мавзусида давра суҳбати бўлиб ўтди.

Тадбирда Академия ва Институтнинг профессор ўқитувчилари, ходимлари, мустақил изланувчилари ҳамда таянч докторантлари иштирок этишди. Шунингдек, онлайн форматида 40 дан зиёд соҳа экспертлари ва тадқиқотчилар қатнашдилар.

Тадбирни Академия бошлиғининг биринчи ўринбосари Е.В.Коленко очиб, кун тартибидаги мавзунинг долзарблигини таъкидлади ва бу тоифадаги жиноятлар профилактикаси самарадорлигини ошириш нафақат ҳуқуқни муҳофаза қилиш ходимларининг балки, ҳуқуқшунослик йўналишида илмий изланиш олиб бораётган тадқиқотчиларни ҳам ўйлантириши зарурлигини қайд этиб ўтди.

Криминология тадқиқот институти бошлиғи Б.Э.Бердиалиев сўнгги йилларда республикада ва унинг айрим ҳудудларида бу турдаги жиноятлар тенденцияси ҳамда уларнинг олдини олиш борасида амалга оширилаётган профилактик тадбирлар ҳақида фикр билдирди.

Давра суҳбати иштирокчилари кун тартибидаги мавзу юзасидан ўз фикр ва мулоҳазаларини билдириб, қонунчилик ҳамда уни татбиқ этишдаги айрим муаммоларга алоҳида тўхталиб ўтдилар.

Йиғилиш якунида иштирокчилар томонидан билдирилган фикр-мулоҳазалар ҳамда хорижий давлатларнинг бу борадаги илғор тажрибаси асосида тан жароҳати етказиш билан боғлиқ жиноятларнинг барвақт олдини олишга қаратилган чора-тадбирлар юзасидан таклиф ва тавсиялар ишлаб чиқилди.