Коррупцияга қарши курашиш ва суд-ҳуқуқ масалалари соҳаларида ҳамкорлик кучайтирилади

Коррупцияга қарши курашиш ва суд-ҳуқуқ соҳасида белгиланган муштарак мақсадлар ва вазифалар ижросининг самарадорлигини ошириш мақсадида жорий йилнинг 9 апрель куни Ҳуқуқни муҳофаза қилиш академияси билан Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси ўртасида ўзаро ҳамкорлик меморандуми имзоланди.

Меморандумнинг асосий мақсади коррупцияга қарши курашиш, суд-ҳуқуқ масалалари бўйича қонунчиликни такомиллаштириш, қонун ижодкорлиги жараёнида олимлар ва мутахассислар иштирокини кенгайтириш, тизимли таҳлилларни амалга ошириш, илмий асосланган таклифлар ишлаб чиқиш, жамиятда коррупцияга нисбатан муросасиз муносабатни шакллантиришга қаратилган.

Ҳамкорлик меморандумига асосан Академия ва Қўмита томонидан коррупцияга қарши курашиш ва суд-ҳуқуқ масалалари бўйича қонун ҳужжатларини такомиллаштириш юзасидан илмий асосланган таклифларни тайёрлаш, коррупцияга олиб келувчи нормаларни аниқлаш, ҳуқуқбузарликларнинг сабаб ва шарт-шароитларини бартараф этиш бўйича таҳлилий фаолиятни амалга ошириш, илмий-амалий тадқиқотлар ўтказиш, жиноятчиликнинг олдини олиш, криминоген вазиятни барқарорлаштиришга оид амалий тадқиқотларни қонунларда акс эттириш, жамиятда коррупцияга нисбатан ҳуқуқий иммунитетни шакллантириш, ёш авлод онгига ҳалоллик қадриятларини сингдириш, талабаларнинг қонунчилик ижодкорлиги амалиётида иштирок этишини ташкил этиш каби ишлар ҳамкорликда амалга оширилиши белгиланган.

Меморандумни имзолаш тантанали маросими билан бир қаторда Қўмита депутатлари Академия фаолияти ва имкониятлари билан яқиндан танишиб чиқиш имкониятига эга бўлишди.

Шунингдек, Қўмита ва Академия раҳбарияти ўзаро ҳамкорликни мустаҳкамлаш ва янги босқичга кўтаришнинг рамзий маъноси сифатида Академия ҳовлисида дарахт экдилар.