Коррупцияга қарши курашишда гендер жиҳатларни жорий этиш мавзусидаги семинар-тренинг ташкил этилди

Ҳуқуқни муҳофаза қилиш академиясида Европада хавфсизлик ва ҳамкорлик ташкилотининг Ўзбекистондаги лойиҳалар координатори кўмагида “Ўзбекистон Республикасида коррупцияга қарши курашишга гендер ёндашувларини жорий этиш” мавзусидаги семинар-тренинг ташкил этилди.

Тадбирнинг мақсади – мутахассисларда коррупцияга қарши чора-тадбирларни ишлаб чиқиш ва амалга оширишда гендер ёндашувини қўллаш компетенцияларини ривожлантириш, коррупция хавфларини таҳлил қилишда гендер хусусиятларини инобатга олиш, Виртуал академия платформасини янги ўқув материаллари билан бойитишдан иборат.

Семинар-тренингда Олий Мажлис Қонунчилик палатаси, Коррупцияга қарши курашиш агентлиги, Бош прокуратура, Адлия, Ички ишлар, Бандлик ва меҳнат муносабатлари вазирликлари, Оила ва хотин-қизлар давлат қўмитаси ҳамда илмий-таълим муассасаларининг масъул вакиллари иштирок этди.

Тадбир ЕХҲТ Котибияти экспертлари томонидан олиб борилиб, иштирокчиларга коррупцияга қарши фаолиятда гендер жиҳатларини инобатга олиш бўйича халқаро ва илғор тажриба, хусусан ишга жойлашишдаги камситиш, таълим ва тиббиёт, ижтимоий ёрдам олишда ҳуқуқларнинг чеклангани каби долзарб муаммолар муҳокама қилинди.

Тадбир якунида иштирокчиларга сертификатлар топширилди.

Мазкур семинар-тренинг натижалари бўйича Виртуал академия электрон платформаси орқали барча давлат органлари ходимлари ва бошқа контингент учун “Гендер ва коррупция” мавзусидаги масофавий ўқув курси ишлаб чиқиш режалаштирилмоқда.