Қашқадарё вилоятида сайёр ўқув амалий машғулотлар ўтказилди

Ҳуқуқни муҳофаза қилиш академияси бошлиғининг биринчи ўринбосари Е.В.Коленко раҳбарлигида жиноятчиликни жиловлаш, коррупцияга қарши курашиш ва энергия самарадорлигини оширишга оид қарорлар ижроси юзасидан ўқув амалий машғулотлар ўтказиш бўйича ишчи гуруҳ тузилди.

Ишчи гуруҳ томонидан ҳудудларга чиқилган ҳолда туркум ўқув ва амалий тадбирлар ўтказиб келинмоқда.

Хусусан, жорий йилнинг 16 апрель куни мазкур ишчи гуруҳ томонидан Қашқадарё вилояти прокуратураси органларида “Энергия ресурсларидан фойдаланиш ва сарфланишига оид қонунчилик ижроси устидан прокурор назорати” мавзусида ўқув семинари ўтказилди.

Ушбу семинар машғулотида вилоят прокурорининг соҳавий ўринбосари, маҳкама ходимлари, туман (шаҳар) прокурорлари ва уларнинг соҳага масъул бўлган ёрдамчилари иштирок этишди.

Ўқув машғулотида энергия ресурсларидан фойдаланиш ва сарфланишига оид қонунчилик ижроси устидан прокурор назоратини таъминлаш бўйича норматив ҳужжатлар ва Бош прокурорнинг соҳавий буйруқлари, фармойишлари ва кўрсатмаларида белгиланган вазифалар, назорат тадбирларида эътибор қаратилиши лозим бўлган масалалар атрофлича ёритиб берилди.

Шунингдек, ўқув семинари иштирокчиларига энергия балансини ишлаб чиқиш, уларнинг кўрсаткичларини бажариш, энергияни тежаш дастурлари ижросини таъминлаш бўйича вазифалар чек-листини амалиётда қўллаш юзасидан тушунтиришлар берилди. 

Мазкур йўналиш бўйича ўқув амалий тадбирлари давом эттирилмоқда.