“Замонавий терговчининг маънавий қиёфаси” мавзусидаги республика ёш юристлар илмий-амалий конференцияси ўтказилди

Ўзбекистон Республикаси Ҳуқуқни муҳофаза қилиш академиясида “Замонавий терговчининг маънавий қиёфаси” мавзусидаги республика ёш юристлар илмий-амалий конференцияси ўтказилди.

Конференцияда мамлакатимиздаги олий ҳарбий ва олий юридик таълим муассасалари, шунингдек юридик соҳа бўйича мутахассислар тайёрлайдиган олий таълим муассасалари талабалари иштирок этди.

Сўнгги йилларда мамлакатимизда дастлабки тергов ва суриштирув жараёнида шахснинг ҳуқуқ ва эркинликлари ишончли ҳимоя қилиниши, унинг шаъни ва қадр-қиммати ҳурмат қилинишини таъминлаш тизимини такомиллаштиришга алоҳида эътибор қаратилди.

Хусусан, Давлатимиз раҳбарининг тегишли Фармонига асосан Ўзбекистон Республикаси Ҳуқуқни муҳофаза қилиш академиясида жиноятларни тергов қилиш соҳасида кадрларни амалиёт билан узвий боғлиқлигини таъминлаган ҳолда ягона ёндашув асосида тайёрлашга қаратилган узлуксиз ўқув тизими йўлга қўйилди.

Академияда инсон ҳуқуқ ва эркинликларига сўзсиз риоя қилиш маданияти билан уйғунлашган юксак маънавий, психологик, таҳлилий ва касбий сифатларни ривожлантиришнинг самарали тизимини жорий этган ҳолда жиноятларни тергов қилиш соҳасида мутахассисларни чуқурлаштирилган мақсадли базавий тайёрлашга асосий эътибор қаратилган.

Бунда бугунги кун терговчиси сифатида «Инсон қадри учун» деган эзгу ғояни қалбан ҳис қила оладиган, юксак маънавий ва ахлоқий фазилатларга эга, онги шуурида, фаолиятида қонун устуворлиги ва қилмиш учун жазо муқаррарлигини таъминлаш тамойили устувор бўлган давлат хизматчиси тушунилади.

Конференцияда терговчи шахсига қўйиладиган талаблар, терговчи маданияти ва маънавияти, терговчи шахсини маънавий ва ахлоқий жиҳатдан баҳолаш, умуман замонавий терговчининг маънавий қиёфаси ҳақида мамлакатимиздаги юридик олий таълим муассасаларида таҳсил олаётган талабаларнинг қарашлари, уларнинг бу борадаги фикр ва мулоҳазаларини ўрганиш имконияти яратилди.

Мазкур Конференцияда Ўзбекистон Республикаси Ҳуқуқни муҳофаза қилиш академиясининг тергов фаолияти соҳаси бўйича таълим олаётган талабалари ҳамда олий ҳарбий ва олий юридик таълим муассасалари талабалари замонавий тергов маданияти ва маънавияти, касб этикаси ва ахлоқий жиҳатлари тўғрисидаги маъруза қилдилар. Академия профессор-ўқитувчилари конференция иштирокчиларининг фикр ва мулоҳазаларига ўзларининг муносабатларини билдирдилар.

Конференция давомида иштирокчиларнинг чиқишлари, фикр ва мулоҳазалари ҳамда таклифлари суриштирувчи ва терговчилар тайёрлашда уларнинг шахсий ва касбий кўникмаларини шакллантиришга қаратилган таълим жараёнини такомиллаштиришда инобатга олиниши белгиланди.