Академияда халқаро UPSHIFT дастури доирасидаги лойиҳаларнинг якуний тақдимоти бўлиб ўтди

Ўзбекистон Республикаси Ҳуқуқни муҳофаза қилиш академиясида Ёшлар ишлари агентлиги, Волонтёрлар ассоциацияси, БМТ Болалар жамғармаси (UNICEF) билан ҳамкорликда жиноятчиликка қарши курашиш ва жиноятларнинг олдини олиш, уюшмаган ёшлар ва хотин-қизларни ижтимоий инновациялар ҳамда ижтимоий тадбиркорликка йўналтириш мақсадида амалга оширилган UPSHIFT лойиҳасининг якуний тақдимоти бўлиб ўтди.

Мазкур тадбирда Академия ходимлари, “UNICEF” халқаро ташкилоти вакиллари, Ўзбекистон волонтёрлар ассоциация, Ўзбекистон кар-соқовлар жамияти, Ўзбекистон савдо-саноат палатаси, Тошкент шаҳар ҳокимлиги, шунингдек давлат ва нодавлат ташкилотлари, кенг жамоатчилик вакиллари, психологлар, лойиҳа иштирокчилари ва менторлари иштирок этишди.

UPSHIFT лойиҳаси доирасида ҳамкор ташкилотлар билан биргаликда ўтказилган ўқув-тренинглар якунида энг яхши ғоялар асосида тайёрланган уч лойиҳа: имконияти чекланган шахсларга мўлжалланган телеграм бот яратишга йўналтирилган “Сизни эшитамиз” лойиҳаси, экологик маданиятни тарғиб қилувчи эко-шоперларни ишлаб чиқарувчи “Eco Art” лойиҳаси, болалар учун ўйин майдончаси ва массаж хизматини бирлаштирган “Баркамол” лойиҳаси ғолиб бўлди.

Мазкур лойиҳалар бошланғич молиялаштириш, менторлик кўмаги ва доимий кузатув билан таъминланди ҳамда бугунги кунда ўз фаолиятини тўлиқ йўлга қўйди.

Тадбирда ушбу лойиҳалар доирасида амалга оширилган ишлар билан таништириб ўтилди. Тадбир давомида сўзга чиққанлар лойиҳалар иштирокчиларининг кейинги фаолиятида муваффақият тилаб, мазкур йўналишдаги ижтимоий лойиҳаларни янада кўпайтириш лозимлигини эътироф этишди.