Коррупцияга қарши курашиш мавзусида навбатдаги семинар

Ҳуқуқни муҳофаза қилиш академияси мутахассислари томонидан Фавқулодда вазиятлар вазирлиги Академиясида коррупцияга қарши курашиш соҳасидаги қонунчилик мазмун-моҳиятига бағишланган семинар машғулоти ўтказилди.

Семинарда ФВВ академияси профессор-ўқитувчилари ва ходимлари иштирок этди. Ҳуқуқни муҳофаза қилиш академияси Коррупцияга қарши курашиш илмий-таълим маркази бошлиғи Худойберди Турсунбеков томонидан Ўзбекистон Республикаси “Коррупцияга қарши курашиш тўғрисида”ги, “Манфаатлар тўқнашуви тўғрисида”ги қонунлар мазмун-моҳияти, коррупцияга оид ҳуқуқбузарликлар, шу жумладан жиноят содир этган шахслар учун жавобгарлик масалалари хусусида батафсил тушунтириш берилди.

Шунингдек, жорий йил 5 март куни Коррупцияга қарши курашиш бўйича миллий кенгашнинг кенгайтирилган йиғилишида Давлат раҳбари томонидан белгиланган устувор вазифалар ижросини таъминлаш, шунингдек, коррупцияга қарши курашиш бўйича янги тизимни жорий этиш, бунга жамоатчилик, парламент ва фуқаролик жамияти институтларини кенг сафарбар этиш мақсадида Президентимиз томонидан 21 апрелда қабул қилинган ПФ-71-сон Фармони мазмун-моҳияти ёритиб берилди.

Тадбир якунида ФВВ Академиясида коррупцияга қарши курашиш бўйича идоравий чора-тадбирларни такомиллаштиришга қаратилган таклиф ва тавсиялар берилиб, иштирокчиларни қизиқтирган саволларга жавоб берилди.