Маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш масалалари муҳокама этилди

Ҳуқуқни муҳофаза қилиш академияси раҳбарияти ҳуқуқни муҳофаза қилиш органларининг илмий-таълим муассасалари томонидан маҳаллалардаги жиноятчилик вазиятини илмий ёндашув асосида ўрганиш масалаларига бағишланган кенгайтирилган йиғилишда иштирок этди.

Тадбир Тошкент шаҳар прокурори Э.Юлдашев ва шаҳар ИИББ бошлиғи Р.Султонхўжаев раислигида Ўзбекистон Республикаси Президентининг 2025 йил 3 январдаги "2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш чора-тадбирлари тўғрисида"ги ПҚ-1-сон қарори ижроси доирасида ҳуқуқни муҳофаза қилувчи органларнинг таълим муассасалари раҳбарлари иштирокида ўтказилди.

Йиғилишда Ҳуқуқни муҳофаза қилиш академиясига бириктирилган маҳаллалар, жумладан пойтахтнинг Бектемир, Яшнобод ва Миробод туманларидаги жиноятчилик вазиятини илмий ёндашувлар асосида ўрганиш бўйича амалга оширилаётган ишлар муҳокама этилди.

Замонавий тадқиқот усулларини жорий этиш, идоралараро ҳамкорликни кучайтириш ва маҳалла фаолларини жамоат хавфсизлигини мустаҳкамлаш жараёнларига жалб қилишга алоҳида эътибор қаратилди.

Мутахассисларнинг хулосалари ва таклифлари маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини янада ошириш бўйича жорий йилнинг иккинчи чораги учун режалаштирилган йўл хариталарининг асосини ташкил этди.