Тартибсиз миграцияни бошқариш ва одам савдосига қарши кураш соҳасида халқаро сертификат дастурида иштирок этилди

Ўзбекистон Республикаси Ҳуқуқни муҳофаза қилиш академияси делегацияси Туркия Республикаси Жандармерия ва Соҳил хавфсизлиги академиясида бўлиб ўтган “Тартибсиз миграцияни бошқариш ва одам савдосига қарши кураш” мавзусидаги халқаро сертификат дастурида муваффақиятли иштирок этди.

Мазкур нуфузли дастурнинг асосий мақсади давлат органлари ходимлари ўртасида ноқонуний миграция, одам савдоси ва терроризмни молиялаштиришга қарши курашиш борасидаги халқаро ҳамкорликни мустаҳкамлаш ҳамда Туркиянинг бу соҳадаги илғор ҳуқуқий, институционал ва ахборот-технологик тажрибасини ўрганиш орқали самарали ечимларни шакллантиришга қаратилган.

Дастурнинг очилиш маросимида Туркия Жандармерия ва Соҳил хавфсизлиги академияси раҳбари ҳамда Болгария, Канада, Чили, Ироқ, Италия, Косово, Мавритания, Марокаш, Польша, Руминия, Россия, Сербия, Испания ва Швеция вакиллари иштирок этдилар.

Ташриф доирасида Академия делегацияси Туркия Жандармерия ва Соҳил хавфсизлиги академияси ҳамда тегишли ҳуқуқни муҳофаза қилувчи органлар томонидан ташкил этилган долзарб мавзулардаги маърузалар ва амалий машғулотларда фаол иштирок этди. Дастур иштирокчилари одам савдоси ва мигрантлар контрабандасини фарқлаш, жабрланганларни аниқлаш ва ҳимоя қилишнинг миллий механизмлари, жамиятда мигрантларга бўлган муносабат ва медиа стереотиплари, миграция социологияси ва ҳимоя тизимларининг ҳуқуқий асослари каби муҳим мавзулар бўйича чуқур билим ва кўникмаларга эга бўлдилар.

Ўқув жараёнида миграция жараёнларига ижтимоий ва ахборот-коммуникациявий нуқтаи назардан ёндашув, мигрантлар билан самарали мулоқот ўрнатиш, уларнинг ҳуқуқларини ҳимоя қилиш, иррегуляр миграция ва инсон савдосига қарши курашда етакчи давлат тузилмаларининг тажрибаси каби масалалар атрофлича муҳокама қилинди.

Дастур якунида иштирокчилар билим ва кўникмалари тест-имтиҳон жараёнида баҳоланди, битирувчиларга сертификатлар топширилди.

Ташриф дастури доирасида делегация аъзолари Туркия Жандармерияси музейи билан танишдилар ҳамда Жиноят ишлари бошқармаси фаолиятини ўргандилар.

Ушбу халқаро сертификат дастуридаги иштирок Ўзбекистон Республикасининг ҳуқуқни муҳофаза қилувчи органлари ходимларининг тартибсиз миграция ва одам савдосига қарши кураш соҳасидаги билим ва кўникмаларини оширишга, шунингдек, халқаро ҳамкорликни янада мустаҳкамлашга хизмат қилади.