Беларусь Республикасининг таълим муассасалари билан халқаро ҳамкорлик кенгайтирилмоқда

Таълим ва илмий фаолият соҳасида, академик, илмий ва маданий алоқаларни ўрнатиш, илмий салоҳиятни ривожлантириш ва мутахассисларни тайёрлаш сифатини таъминлаш мақсадида Академия вакиллари Беларусь Республикасига ташриф буюрдилар.

Ташриф давомида Академия вакиллари Янка Купала номидаги Гродно давлат университетининг фаолияти, шу жумладан академик мобиллик, таълим лойиҳалари ва илмий ҳамкорлик масалалари билан танишдилар.

Университетнинг юридик факультети раҳбарияти ва профессор-ўқитувчилари билан учрашувлар ўтказилди, шунингдек университет, Ватанпарварлик тарбия маркази ва талабалар ётоқхонасига экскурсиялар ташкил этилди.

Академия вакиллари ҳуқуқшунослик фанлари бўйича Университетлар орасидаги олимпиада очилишида иштирок этдилар.

Шунингдек, Ўзбекистон Республикасидан келган талабалар билан учрашув ташкил этилди.

Ташриф натижасида ҳамкорлик бўйича келишув имзоланди, бу томонлар ўртасидаги халқаро ҳамкорликни ривожлантириш ва тажриба алмашиш имкониятларини яратади.

Бундан ташқари, Академия вакиллари Беларусь Республикаси Тергов қўмитасининг малака ошириш ва қайта тайёрлаш институтига ташриф буюрдилар. Учрашув давомида ўқув аудиториялари ва уларнинг замонавий жиҳозлари, криминалистик техника, полигонлар, ўқув ва илмий адабиётлар намойиш этилди.

Учрашув якунида таълим ва илм-фан сифати ва самарадорлигини яхшилашга қаратилган истиқболли ҳамкорлик йўналишлари белгилаб олинди. Томонлар ҳамкорликнинг янги босқичига қадам бўладиган ҳамкорлик қўшма дастурини ишлаб чиқиш ва тасдиқлашга келишиб олдилар.

Беларусь Республикасига ташриф илмий-тадқиқот ва таълим алоқаларини ривожлантириш ва мустаҳкамлашда муҳим қадам бўлди.