“АКТ-жиноятлари: аниқлашдан суд қарорига қадар (судьялар учун кириш курси)” семинар-тренинглар якунланди

Жорий йилнинг апрель ойида ўтказиб келинган “АКТ-жиноятлари: аниқлашдан суд қарорига қадар (судьялар учун кириш курси)” мавзусида семинар-тренинглар туркуми муваффақиятли якунланди. Тадбирлар ЕХҲТнинг Ўзбекистондаги лойиҳалар координатори томонидан, Ўзбекистон Республикаси Ҳуқуқни муҳофаза қилиш академиясининг Рақамли криминалистика илмий-тадқиқот институти, Судьялар Олий кенгаши ва Судьялар олий мактаби билан ҳамкорликда ташкил этилган.

Семинар-тренинглар 14-15 апрель кунлари Тошкент шаҳрида, 21-22 апрель кунлари Фарғона шаҳрида ва 23-24 апрель кунлари Наманган шаҳрида ўтказилди. Уларда тергов судьялари, ахборот технологиялари соҳасидаги жиноятлар билан боғлиқ жиноят ишларини кўриб чиқувчи судьялар, шу жумладан вилоят, шаҳар ва туман судларининг жиноят ишлари бўйича коллегиялари вакиллари иштирок этдилар. Бундан ташқари, таълим дастури доирасида прокуратура органлари ва ички ишлар органлари ходимлари учун алоҳида машғулотлар ўтказилди.

Етакчи экспертлар сифатида Иқтисодиёт олий мактаби Миллий тадқиқот университети (Москва) жиноят ҳуқуқи ва криминалистика департаменти доценти Кирилл Клевцов, Академиянинг Рақамли криминалистика илмий-тадқиқот институти бошлиғи Ғайрат Мусаев ва шу институтининг Ихтисослаштирилган рақамли тадқиқотлар маркази бошлиғи Хагани Гаджиев иштирок этдилар.

Тренинглар дастури судьяларда ахборот технологиялари соҳасидаги жиноятларни малакалаш ва кўриб чиқиш бўйича зарур компетенцияларни шакллантиришга бағишланган. Алоҳида эътибор жиноят процессида рақамли далилларнинг мақбуллиги, уларнинг алоқадорлиги ва ишончлилигини баҳолаш мезонлари, электрон маълумотларни тадқиқ қилиш усуллари ва кибержиноятчиликка қарши курашиш соҳасидаги халқаро-ҳуқуқий стандартларга қаратилди.

Наманган шаҳрида ЕХҲТнинг Ўзбекистондаги миссияси раҳбари Антти Карттунен иштирокида семинар-тренинглар ёпилиш маросими бўлиб ўтди. Иштирокчилар тренингларнинг амалий йўналтирилганлиги, материалларнинг долзарблиги ва экспертларнинг профессионаллигини юқори баҳоладилар, шунингдек, бундай тадбирларини мунтазам ўтказиш зарурлигини таъкидладилар.