Ихтисослаштирилган прокурорлар корпуси ходимлари учун ташкиллаштирилган малака ошириш курси

Академияда Бош прокурор томонидан ўқув жараёнини прокуратура органларининг касбий фаолияти билан узвий боғлиқлигини таъминлашга оид белгиланган вазифалар ижроси доирасида Ихтисослаштирилган прокурорлар корпусининг вилоятлар ва уларга тенглаштирилган прокуратураларнинг тегишли тармоқлари ҳамда туман (шаҳар) прокурорларининг соҳавий ёрдамчилари иштирокида “Иқтисодий, фуқаролик, маъмурий суд ишларини юритишда прокурор иштироки самарадорлигини ошириш масалалари” мавзусида малака ошириш курси ўтказилди.

Курс дастури прокуратура фаолиятининг умумий масалалари, шунингдек фуқаролик, иқтисодий, маъмурий суд ишларини юритишда прокурор ваколатини таъминлаш масалаларини қамраб олган бўлиб, асосий эътибор қонунчиликка киритилган ўзгартишлар ва уларни амалиётда қўллаш масалаларига қаратилди.

Малака ошириш курсининг Академияда ўтказилган якуний босқичида тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида прокурорларнинг судларга даъво аризалари (аризалар) киритиш, судларнинг ноқонуний ва асоссиз қарорларига протест лойиҳаларини тайёрлаш, муаммоли-вазиятли ҳолатларни таҳлил қилиш ва казуслар ечимини топиш тарзида ўтказилди.

Малака ошириш курси натижаларига кўра тингловчилар томонидан мустақил равишда тайёрланган лаборатория ишларининг ҳимояси савол-жавоблар тарзида амалга оширилди.

Шунингдек, ўқув курси доирасида Ўзбекистон Республикаси Бош прокуратурасининг музейига ташкиллаштирилган ташриф тингловчиларда катта қизиқиш уйғотди.