Сурхондарё вилоятида сайёр ўқув ва амалий машғулотлар ташкил этилди

Академия бошлиғининг биринчи ўринбосари Е.В.Коленко раҳбарлигидаги ишчи гуруҳ томонидан Сурхондарё вилоятида жиноятчиликни жиловлаш, коррупцияга қарши курашиш ва энергия самарадорлигини оширишга оид қонунчилик ижроси юзасидан сайёр ўқув ва амалий машғулотлар ташкил этилди.

Дастлаб ишчи гуруҳ томонидан вилоят прокуратура органлари раҳбарияти, маҳкама ходимлари, туман (шаҳар) прокурорларининг соҳага масъул ёрдамчилари иштирокида “Энергия ресурсларидан фойдаланиш ва сарфланишига оид қонунчилик ижроси устидан прокурор назорати” мавзусидаги ўқув семинари ўтказилди.

Ўқув тадбирида энергия ресурсларидан фойдаланиш ва сарфланишига оид қонунчилик ижроси устидан прокурор назоратини таъминлаш бўйича белгиланган вазифалар, назорат тадбирларида эътибор қаратилиши лозим бўлган масалалар атрофлича ёритиб берилди.

Навбатдаги ўқув машғулоти вилоят прокуратураси маҳкама ходимлари, туман (шаҳар) прокурорлари учун “Коррупциянинг олдини олиш, унга қарши курашиш, шу жумладан, маиший коррупцияга барҳам бериш” мавзусида ташкил этилиб, унда жойларда кундалик ҳаётда содир этилаётган маиший коррупциянинг турлари, уларнинг олдини олишга қаратилган тадбирлар ҳамда прокуратура органларига бу борада юклатилган вазифалар хусусида батафсил тўхталиб ўтилди.

Ўқув машғулотлари давом эттирилиб, туман (шаҳар) прокурорлари ва соҳавий ўринбосарлари иштирокида “Маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини ошириш” мавзусида ўқув семинари ўтказилди.

Мазкур тадбир доирасида иштирокчиларга жиноятчиликнинг барвақт олдини олишнинг янги тизими, ҳудуддаги криминоген вазиятнинг кундалик таҳлилини амалга ошириш, соҳада прокурор назоратини самарали ташкил этиш ҳамда латент жиноятларни фош этиш масалалари муҳокама қилинди.

Тадбир якунида вилоят прокуратура ва ички ишлар органлари маҳкамалари, шунингдек туман (шаҳар) терговчилари учун “Кибержиноятларни тергов қилиш кетма-кетлиги ва рақамли далилларни мақбуллигини таъминлаш” мавзусида амалий машғулот ўтказилди ва иштирокчиларни қизиқтирган саволлар бўйича атрофлича маълумот берилди.

Академия томонидан ҳудудларда мазкур долзарб йўналишлардаги ўқув ва амалий машғулотлар тизимли давом эттирилмоқда.