Болалар ҳуқуқларини таъминлаш тизими соҳасида ҳамкорликни кенгайтириш масалалари муҳокама қилинди

Академияда Ўзбекистон Республикаси Олий Мажлисининг болалар ҳуқуқлари бўйича вакили (Болалар омбудсмани) С.Раҳмонова, Ўзбекистондаги БМТ Болалар жамғармаси (ЮНИСЕФ) вакиллари С.Ахаева ва Ш.Ашрафханова билан Академия раҳбарияти ва ходимларининг учрашуви бўлиб ўтди.

Тадбир болалар ҳуқуқларини ҳимоя қилиш масалаларида давлат институтлари ва халқаро ташкилотлар ўртасидаги ҳамкорликни мустаҳкамлаш доирасида ташкил этилди.

Муҳокама қилинган асосий мавзулар болалар ҳуқуқларини ҳимоя қилиш соҳасида ҳамкорликни чуқурлаштириш, халқаро стандартларга мувофиқ миллий қонунчиликни такомиллаштириш ва болалар ҳуқуқлари бўйича махсус таълим курсини ишлаб чиқиш масалалари бўлди.

ЮНИСЕФ билан ҳамкорликда бошланган ушбу янги курс мутахассислар ва ёшлар ўртасида болалар ҳуқуқлари бўйича хабардорликни ошириш, шунингдек, уларни амалий жиҳатдан таъминлаш кўникмаларини ривожлантиришга қаратилган.

Учрашув иштирокчилари болалар ҳуқуқларини таъминлаш бўйича самарали тизим яратишда ҳамкорликда ишлаш муҳимлигини таъкидладилар. Педагоглар, ижтимоий ходимлар ва ҳуқуқни муҳофаза қилувчи органлар ходимларини тайёрлашда мазкур таълим курсини интеграция қилиш орқали болалар ҳуқуқларини ҳимоя қилишга комплекс ёндашувни таъминлаш бўйича таклифлар илгари сурилди.