1 июнь – Халқаро болаларни ҳимоя қилиш кунига бағишланган маданий-маърифий тадбир ташкил этилди

Ўзбекистон Республикаси Ҳуқуқни муҳофаза қилиш академияси томонидан Юнусобод тумани прокуратураси билан ҳамкорликда Юнусобод туманидаги алоҳида таълимга эҳтиёжи бўлган болалар учун мўлжалланган 87-сонли мактабда 1 июнь – Халқаро болаларни ҳимоя қилиш кунига бағишланган маданий-маърифий тадбир ташкил этилди.

Байрам тадбирида Академия раҳбарияти, ходимлари ва талабалари, Юнусобод тумани прокуратураси раҳбар ва ходимлари, 13-сонли Мусиқа ва санъат мактаби, туман Маданият бўлими вакиллари, 87-сонли мактаб ўқувчилари ва уларнинг ота-оналари иштирок этишди.

Тадбир давомида мазкур мактаб ўқувчилари ўзларининг бадиий чиқишлари, рақс ва қўшиқлари билан иштирок этдилар.

Тадбирга ташриф буюрган хонандалар чиқишлари, туманда жойлашган 13-сонли Мусиқа ва санъат мактаби ўқувчилари томонидан намойиш этилган саҳна кўриниши ва чиқишлар тадбир иштирокчилари учун ҳақиқий байрам муҳитини яратди.

Ҳар бир чиқиш – рақслар, қўшиқлар, кўнгилочар саҳналар ва бошқа кўргазмалар катта олқишлар билан қўллаб-қувватланди.

Халқаро болаларни ҳимоя қилиш куни – бу ҳаёт шароитлари туфайли ҳозирда муҳофаза ва қўллаб-қувватлашга муҳтож бўлган болаларга эътибор қаратиш ва ёрдам беришга чақириқдир, шунингдек, жамиятга бола ҳуқуқларини ҳимоя қилишнинг зарурлигини унутмаслик ҳақида эслатмадир.

Халқаро болаларни муҳофаза қилиш куни – бу хурсандчилик, умид ва табассумлар байрами бўлиб, бу кунда барча катталар, жамиятимизнинг ҳар бир аъзоси бирлашиб, ҳар бир бола учун хавфсиз ва бахтли болалик яратиш ғояси атрофида бирлашади.