Академия ходимларининг Швециянинг Лунд университетида навбатдаги стажировкаси

Ҳуқуқни муҳофаза қилиш академияси вакиллари Швециянинг Лунд университетида “Марказий Осиё ҳуқуқи: Марказий Осиёда ҳуқуқий маданиятлар ва бизнес муҳити” лойиҳаси доирасида стажировка ўтаб қайтишди.

Стажировка давомида ходимлар Лунд университетининг ўқитиш, илмий тадқиқотларни олиб бориш тизими билан яқиндан танишиб, бу борада университетнинг етакчи профессор-ўқитувчилари билан илмий учрашувлар ташкил этишди ҳамда ўзаро амалий тажрибалари билан ўртоқлашишди.

Шунингдек, Лунд университетининг Ҳуқуқ социологияси департаменти томонидан ташкил этилган “Ноғарбий жамиятларда коррупция: Марказий Осиёдан қарашлар” мавзусидаги халқаро конференцияда иштирок этишди.

Хусусан, ушбу тадбирда Академиянинг факультет бошлиғи А.Ҳидоятуллаев “Суд ҳужжатлари ва бошқа органлар ҳужжатларини ижро этиш самарадорлигини ошириш муаммолари ва истиқболлари”, марказ бошлиғи Ш.Шайзаков “Коррупцияга қарши ҳуқуқий экспертизада коррупция ва бюрократик тўсиқларга қарши курашишнинг ҳуқуқий асослари (Ўзбекистон мисолида)”, кафедра бошлиғи А.Комилов “Меҳнат мигрантлари учун имтиёз ва преференциялар: Ўзбекистон мисолида”, кафедра доценти С.Шомирзаев “Коррупциявий жиноятларга қарши курашиш ва уларнинг олдини олиш чоралари: хорижий амалиёт ва қиёсий-ҳуқуқий таҳлил”, марказ прокурори Т.Сафаров “Коррупциянинг ижтимоий-маданий манбалари сифатида урф-одат ва анъаналар: Марказий Осиё амалиётида ҳуқуқий ва криминологик таҳлил” мавзуларда маъруза билан иштирок этишди.

Стажировка якунида ходимлар томонидан илмий мақолалар тайёрланди ва юқори рейтингга эга бўлган хорижий журналларга юборилди.

Ўзбекистон Республикаси Ҳуқуқни муҳофаза қилиш академияси ҳамда Швециянинг Лунд университети ўртасидаги ҳамкорлик давом этмоқда.