Корея Адлия институти делегациясининг Академияга ташрифи

2018 йил 27 ноябрь куни Ўзбекистон Республикаси Бош прокуратура Академиясига Корея Адлия институтининг профессори, катта прокурор Чо Жаэбин бошчилигидаги делегация ташриф буюрди.

Ташриф доирасида ўқув жараёнларини ташкил қилиш бўйича келажакдаги режалар, одил судлов ва криминалистика соҳаларида ҳалқаро ҳамкорликни ривожлантириш масалалари, биргаликдаги амалга оширилиши лозим бўлган вазифалар, рақамли экспертизаларни тайинлаш ва ўтказиш аҳамияти ва истиқболлари муҳокама қилинди.

Корея Адлия институти вакиллари томонидан прокурорларни институтда ўқитиш даврийлиги, уларни ташкил қилинишидаги ўзига хослик, ўқитилаётган контингент, қайта тайёрлаш жараёни ҳақида маълумот берилди.

Ўз навбатида Академия раҳбарияти томонидан бугунги кунда Академия  олдида турган долзарб вазифалар, ўқитиш жараёнидаги ўзига хос жиҳатлар, прокуратура тизими ходимларини ўқитишда қўлланилаётган янги педагогик усуллар, электрон таълим бериш жараёни изоҳланди.

Ўзбекистон Республикаси Жиноят-процессуал қонунчилигини такомиллаштиришда электрон маълумотларни олиш ва далил сифатида мустаҳкамлаш борасидаги киритилиши кутилаётган ўзгартишлар юзасидан фикр-мулоҳазалар билдирилди.

Корея Адлия институти вакиллари Академия ўқув хоналари, профессор ўқитувчилар ва тингловчилар учун яратиб берилган шароитлар билан таништирилди.

Тадбир якунида Корея Адлия институти раҳбариятининг Бош прокуратура Академиясига ташрифи билан боғлиқ масалалар муҳокама қилинди ва ҳамкорликни янада ривожлантириш икки томон учун ҳам манфаатли деган хулосага келинди.