Академия вакили Париж-Сакле университетида маъруза қилди

Франциянинг нуфузли Париж-Сакле университетида бўлиб ўтган илмий семинарда Ҳуқуқни муҳофаза қилиш академияси Халқаро ҳуқуқ ва инсон ҳуқуқларини ҳимоя қилиш кафедраси бошлиғи Л.Х.Исоқов “Марказий Осиё мигрантлари ҳуқуқларининг ҳимояси: қиёсий-ҳуқуқий таҳлил” мавзусида маъруза қилди.

Семинар Париж-Сакле университетининг Ҳуқуқшунослик факультети ва Оммавий ҳуқуқ илмий-тадқиқот институти томонидан постдокторантура дастури доирасида ташкил этилди. Унда Франциянинг етакчи профессор-ўқитувчилари, докторантлари ҳамда тадқиқотчилари иштирок этди.

Л.Х.Исоқов ўз маърузасида Марказий Осиёдан келган меҳнат мигрантларининг ҳуқуқий мақоми, уларнинг қабул қилувчи мамлакатларидаги ҳуқуқий ҳимоясидаги фарқлар, виза ва яшаш ҳуқуқига доир тартиботлар, мигрантларга нисбатан ҳуқуқни муҳофаза қилувчи органларнинг муносабати ва ижтимоий ҳимоя тизимидаги муаммолар юзасидан қиёсий таҳлил тақдим этди. Шунингдек, инсон ҳуқуқларини таъминлаш соҳасида Ўзбекистонда амалга оширилаётган ислоҳотлар, қонун устуворлигини таъминлаш ва халқаро ҳамкорлик масалалари алоҳида қайд этилди.

Маълумот ўрнида, Париж-Сакле университети дунё миқёсида етакчи олий таълим муассасаларидан бири ҳисобланиб, U.S. News & World Report Best Global University Ranking рейтингига кўра Францияда 1-ўринни, ARWU (Academic Ranking of World Universities) рейтингига кўра эса таълим сифати бўйича дунёда 13-ўринни эгаллайди.

Постдокторантура дастурининг асосий мақсади – Марказий Осиё мамлакатларининг юқори салоҳиятли ҳуқуқшунос мутахассисларини қонун устуворлигини таъминлаш ва долзарб ҳуқуқий муаммолар юзасидан илмий тадқиқотларга жалб этиш, ўзаро билим ва тажриба алмашиш орқали халқаро даражада рақобатбардош илмий кадрлар тайёрлашдан иборат.

Айни пайтда Академия ва Париж-Сакле университети ўртасидаги қўшма илмий тадқиқот давом этмоқда.