Академияда халқаро экспертлар маслаҳат йиғилиши бўлиб ўтди

Ўзбекистон Республикаси Ҳуқуқни муҳофаза қилиш академиясида ҳодиса содир бўлган жойни кўздан кечириш чоғида ашёвий далилларни тўплаш ва сақлаш самарадорлигини оширишнинг долзарб масалалари бўйича халқаро экспертлар маслаҳат учрашуви бўлиб ўтди. Тадбирда турли давлатлар ва ташкилотлардан етакчи мутахассислар, олимлар ва суд-экспертиза экспертлари иштирок этди. Асосий эътибор суд-экспертиза тизимини ривожлантириш, ашёвий далиллар билан ишлаш жараёнларини такомиллаштириш ва замонавий технологияларни жорий этишга қаратилди.

Учрашувда суд-экспертиза муассасаларининг моддий-техника базасини мустаҳкамлаш, халқаро стандартлар асосида илғор усулларни қўллаш, суд экспертларининг малакасини ошириш ва гиёҳванд моддаларга қарши курашда экспертиза ролини кучайтириш масалалари муҳокама қилинди. Тадбир АҚШ Давлат департаментининг Халқаро гиёҳвандликка қарши кураш ва ҳуқуқни муҳофаза қилиш бюроси молиявий кўмагида, БМТнинг Гиёҳванд моддалар ва жиноятчилик бўйича бошқармаси ва Ҳуқуқни муҳофаза қилиш академияси ҳамкорлигида ўтказилди.

Учрашув натижалари суд-экспертиза соҳасида илмий-услубий ёндашувларни яхшилаш, замонавий технологияларни қўллаш ва кадрлар тайёрлашни ривожлантириш бўйича стратегик йўналишларни белгилашга хизмат қилади. Халқаро ҳамкорликни кенгайтириш ва қўшма илмий тадқиқот лойиҳаларини бошлаш бўйича таклифлар қабул қилинди.