Криминоген вазиятни таҳлил қилиш масалалари юзасидан малака ошириш курси ўтказилди

Ҳуқуқни муҳофаза қилиш академиясида Қорақалпоғистон Республикаси, Тошкент шаҳри ва вилоятлар прокуратураларининг криминоген вазиятни таҳлил қилиш бўлим бошлиқлари учун махсус ўқув курси ташкил этилди.

Ўзбекистон Республикаси Президентининг тегишли қарори билан тузилган мазкур тармоқ бошлиқлари учун ташкил этилган курсга Академиянинг профессор-ўқитувчилари билан бир қаторда Бош прокуратуранинг Криминоген вазиятни таҳлил қилиш бошқармаси ходимлари, ИИВ криминоген вазиятни акс этувчи маълумотларни ўз ичига олган ахборот тизимларини юритишга масъул бўлган хизматлар мутахассислари, шунингдек, Криминология-тадқиқот институти мутахассислари жалб қилинди.

Тингловчиларга ҳуқуқбузарликларнинг барвақт олдини олиш ҳамда жиноятчиликни жиловлаш, криминоген вазиятни кундалик таҳлил қилиш фаолиятини такомиллаштириш, прокуратура органларида ахборот таҳлил фаолиятини ташкил этиш борасида машғулотлар ўтказилиб, “Е-Ижтимоий профилактика”, “Е-Материал”, “Е-Маъмурий иш”, “Электрон жиноий-ҳуқуқий статистика” электрон ахборот тизимларининг имкониятларидан фойдаланиш бўйича батафсил тушунтиришлар берилди. Аудитория машғулотлари баробарида амалий машғулотлар ташкил этилгани билим ва кўникмаларни мустаҳкамлаш имконини берди.

Ўқув курси якунига кўра тингловчиларга белгиланган тартибда махсус сертификатлар тақдим этилди.