Прокуратура органларининг Жамоатчилик билан алоқалар ва ҳуқуқий ахборот тармоқлари ходимлари малакасини ошириш курси якунланди

Ўзбекистон Республикаси Ҳуқуқни муҳофаза қилиш академиясида прокуратура органларининг Жамоатчилик билан алоқалар ва ҳуқуқий ахборот тармоқлари ходимлари учун “Оммавий ахборот воситалари билан ҳамкорлик, жамоатчилик билан алоқалар технологиялари, фикр ва ахборот эркинлиги” мавзусида малака ошириш курси ўтказилди.

Малака ошириш курси дастурида аудитория машғулотлари билан бир қаторда амалий машғулотлар ва сайёр ўқув машғулотлар назарда тутилган бўлиб, уларни ўтказиш жараёнига Академия ходимлари билан бир қаторда медиа соҳасида катта тажрибага эга бўлган эксперт ва мутахассислар жалб қилинган.

Тингловчилар ўқув машғулотлари давомида фикр эркинлиги, ахборотни излаш, олиш ва тарқатиш борасидаги халқаро стандартлар талаблари ва миллий  қонунчилик таҳлили, прокуратура органлари тизимида жамоатчилик ва ОАВ билан алоқаларни самарали амалга ошириш бўйича устувор вазифалар,  ахборот маконида жиноятчилик билан боғлиқ масалаларни ёритишга доир масалалар, прокурор риторикаси, мулоқотдаги низоли  вазиятлар ва уларни бошқариш усуллари, стрессга бардошлилик ва стрессни бошқариш имкониятлари, контент яратиш жараёнида сунъий интеллект имкониятларини самарали қўллаш масалалари юзасидан маълумотга эга бўлдилар.

Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида ташкил  этилган сайёр машғулот давомида Агентликнинг Ахборот хизматлари фаолиятини ташкил қилиш ва мувофиқлаштириш бошқармаси мутахассислари томонидан давлат органларида очиқликни таъминлаш механизмлари, фуқароларни ахборот билан таъминлашнинг ҳамда ОАВ ва блогерлар билан мулоқотнинг ҳуқуқий асослари, ахборот хизматлари йўналишида проактив фикрлашни шакллантириш, маълумот тарқатишда гендер сезгирликка аҳамият бериш, ахборотнинг жамоатчилик кайфиятига таъсирини мониторинг қилиш зарурлигига алоҳида эътибор қаратилди. Шунингдек, расмий муносабат бериш, ахборот хизматлари фаолиятида медиа-режалаштириш, фаолият самарадорлигини баҳолашдаги мезонлар, тизимли таҳлил ва медиа кўрсаткичлар асосида самарали қарорлар қабул қилиш масалалари атрофлича муҳокама қилинди.

Тингловчилар учун амалий ва стратегик кўникмаларни мустаҳкамлаш, соҳага замонавий коммуникация воситалари ва ахборот сиёсатини татбиқ этиш борасида муҳим тажриба эканлиги қайд этилди.

Тингловчилар шунингдек Ўзбекистон прокуратураси тарихи музейига ташриф буюриб, прокуратура органларининг шаклланиш ва ривожланиш босқичлари билан яқиндан танишдилар. Экспозицияда соҳа тарихидаги муҳим жараёнлар билан бир қаторда қатағон даври қурбонларининг хотираси, ҳуқуқни муҳофаза қилиш йўлида фидокорона хизмат қилган юрт фидоийларининг ҳаёти ва фаолияти ўз ифодасини топган бўлиб, тингловчиларда касбга бўлган ҳурмат ва фахр туйғуларини янада мустаҳкамлади.

Курс доирасида тингловчилар билим ва кўникмалари диагностика қилинди. Малака ошириш курси якунида тингловчиларга сертификатлар топширилди.