Кибержиноятларга қарши кураш соҳасида ҳамкорлик тўғрисидаги меморандум имзоланди

 
2025 йил 3 июнь куни, Тошкент давлат юридик университетида Ўзбекистон Республикаси Ҳуқуқни муҳофаза қилиш академияси билан Тошкент давлат юридик университети ўртасида ҳамкорлик тўғрисидаги Меморандумни расман имзолаш маросими бўлиб ўтди.

Мазкур ҳамкорлик, Ўзбекистон Республикаси Президентининг 2025 йил 22 январдаги ПҚ–17-сон қарори – “Рақамли технологиялар воситасида содир этиладиган жиноятларга қарши курашиш соҳаси учун профессионал кадрлар тайёрлаш тизимини жорий этиш чора-тадбирлари тўғрисида”ги қарорда белгиланган устувор вазифалар ижросини таъминлашга қаратилган.

Меморандум рақамли технологиялар воситасида содир этиладиган жиноятларга қарши самарали курашиш, киберхавфсизликни ҳуқуқий таъминлаш ва ушбу йўналишда юқори малакали кадрлар тайёрлаш соҳасида ўзаро ҳамкорликни ривожлантириш назарда тутилган.

Тадбирда ҳар иккала муассаса раҳбарлари, профессор-ўқитувчилари ва соҳада фаолият юритаётган мутахассислар иштирок этди. Томонлар ҳамкорлик доирасида бир қатор устувор йўналишларда амалий ишларни йўлга қўйишга келишиб олдилар, жумладан:

• киберҳуқуқ ва киберхавфсизлик соҳасида таълим ва илмий тадқиқотларни интеграция қилиш;
• магистратура босқичи дастурлари ва ўқув-методик материалларни янгилаш;
• киберҳуқуқ ва киберхавфсизлик бўйича қайта тайёрлаш ва малака ошириш курсларини ташкил этиш;
• мазкур йўналишда қўшма илмий лойиҳалар ва нашрларни амалга ошириш.

Шунингдек, тадбирда ахборот-ресурс марказлари, кутубхоналар ва лабораториялардан ўзаро фойдаланиш имкониятларини яратиш масалалари муҳокама қилинди.

Меморандум муассасалар ўртасида илмий ва амалий ҳамкорликни янги босқичга олиб чиқишга қаратилган муҳим қадам бўлиб хизмат қилади.