Евроосиё гуруҳининг 42-Ялпи ҳафталиги тадбирларида иштирок эилди

Академия раҳбарияти жорий йилнинг 26-30 май кунлари Москва шаҳрида бўлиб ўтган Жиноий даромадларни легаллаштиришга ва терроризмни молиялаштиришга қарши курашиш (ЖДЛ/ТМҚК) бўйича Евроосиё гуруҳининг 42-Ялпи ҳафталиги тадбирларида иштирок этди.

26 май куни бўлиб ўтган Евроосиё гуруҳига аъзо мамлакатлар ва ташкилотларнинг ЖДЛ/ТМҚК бўйича ўқув-услубий марказ раҳбарларининг ишчи учрашуви доирасида ўтказилган давра суҳбатида Академия томонидан молиявий хавфсизлик соҳасида амалга оширилган ўқув ва маърифий тадбирлари тўғрисида ахборот берилди.

Шунингдек, Академия вакили Баҳолаш ва ҳуқуқий масалалар бўйича ишчи гуруҳининг ҳамраиси сифатида ишчи гуруҳ йиғилишини олиб борди ҳамда тадбир якунида ташкил этилган давра суҳбатида “Оммавий қирғин қуролини тарқатишни молиялаштириш билан боғлиқ таваккалчиликларни миллий даражада баҳолаш: Ўзбекистон Республикаси тажрибаси” мавзусида тақдимот билан чиқиш қилди.

27 май куни ўтказилган Жиноий даромадларни легаллаштиришга ва терроризмни молиялаштиришга қарши курашиш соҳасидаги халқаро тармоқ институтининг 22-йиғилишида Академия вакили Ўзбекистон Республикасида молиявий хавфсизлик бўйича ҳаракатни қўллаб-қувватлашга доир чоралар тўғрисида маъруза қилди.

ЖДЛ/ТМҚК миллий тизимининг эксперт салоҳиятини ошириш ва кадрларни тайёрлаш масалаларини муҳокама қилиш мақсадида 28 май куни Ҳуқуқни муҳофаза қилиш академияси бошлиғининг биринчи ўринбосари Е.Коленко ҳамда Молиявий мониторинг бўйича халқаро ўқув-методик маркази (МУМЦФМ) Бош директори И.Уваровнинг учрашуви ўтказилди. Ҳамкорликда амалга оширилаётган таълим лойиҳалари доирасида “Евроосиё минтақасидаги мамлакатларнинг ЖДЛ/ТМҚК тизимининг ўзига хос жиҳатлари. 4 том. Ўзбекистон  Республикаси” номли ўқув қўлланмасини ишлаб чиқиш ва чоп этишга қўшган ҳиссаси учун МУМЦФМ раҳбарияти ва ходимлари ташаккурнома билан тақдирланди.

29-30 май кунлари Евроосиё гуруҳининг 42-Ялпи мажлиси доирасида иштирокчиларга жорий йилнинг май ойида Академия томонидан ўрта-махсус таълим муассасаларининг ўқувчилари ўртасида ўтказилган Молиявий хавфсизлик бўйича миллий олимпиада тўғрисида  видеолавҳа намойиш этилди.

Академия раҳбариятининг Евроосиё гуруҳининг ялпи ҳафталиги тадбирларида иштироки Академиянинг халқаро ҳамкорлигининг янада кенгайишига хизмат қилди.