Yevroosiyo guruhining 42-Yalpi haftaligi tadbirlarida ishtirok eildi

Akademiya rahbariyati joriy yilning 26-30-may kunlari Moskva shahrida bo‘lib o‘tgan Jinoiy daromadlarni legallashtirishga va terrorizmni moliyalashtirishga qarshi kurashish (JDL/TMQK) bo‘yicha Yevroosiyo guruhining 42-Yalpi haftaligi tadbirlarida ishtirok etdi.

26-may kuni bo‘lib o‘tgan Yevroosiyo guruhiga a’zo mamlakatlar va tashkilotlarning JDL/TMQK bo‘yicha o‘quv-uslubiy markaz rahbarlarining ishchi uchrashuvi doirasida o‘tkazilgan davra suhbatida Akademiya tomonidan moliyaviy xavfsizlik sohasida amalga oshirilgan o‘quv va ma’rifiy tadbirlari to‘g‘risida axborot berildi.

Shuningdek, Akademiya vakili Baholash va huquqiy masalalar bo‘yicha ishchi guruhining hamraisi sifatida ishchi guruh yig‘ilishini olib bordi hamda tadbir yakunida tashkil etilgan davra suhbatida “Ommaviy qirg‘in qurolini tarqatishni moliyalashtirish bilan bog‘liq tavakkalchiliklarni milliy darajada baholash: O‘zbekiston Respublikasi tajribasi” mavzusida taqdimot bilan chiqish qildi.

27-may kuni o‘tkazilgan Jinoiy daromadlarni legallashtirishga va terrorizmni moliyalashtirishga qarshi kurashish sohasidagi xalqaro tarmoq institutining 22-yig‘ilishida Akademiya vakili O‘zbekiston Respublikasida moliyaviy xavfsizlik bo‘yicha harakatni qo‘llab-quvvatlashga doir choralar to‘g‘risida ma’ruza qildi.

JDL/TMQK milliy tizimining ekspert salohiyatini oshirish va kadrlarni tayyorlash masalalarini muhokama qilish maqsadida 28-may kuni Huquqni muhofaza qilish akademiyasi boshlig‘ining birinchi o‘rinbosari Ye.Kolenko hamda Moliyaviy monitoring bo‘yicha xalqaro o‘quv-metodik markazi (MUMSFM) Bosh direktori I.Uvarovning uchrashuvi o‘tkazildi. Hamkorlikda amalga oshirilayotgan ta’lim loyihalari doirasida “Yevroosiyo mintaqasidagi mamlakatlarning JDL/TMQK tizimining o‘ziga xos jihatlari. 4 tom. O‘zbekiston  Respublikasi” nomli o‘quv qo‘llanmasini ishlab chiqish va chop etishga qo‘shgan hissasi uchun MUMSFM rahbariyati va xodimlari tashakkurnoma bilan taqdirlandi.

29-30-may kunlari Yevroosiyo guruhining 42-Yalpi majlisi doirasida ishtirokchilarga joriy yilning may oyida Akademiya tomonidan o‘rta-maxsus ta’lim muassasalarining o‘quvchilari o‘rtasida o‘tkazilgan Moliyaviy xavfsizlik bo‘yicha milliy olimpiada to‘g‘risida  videolavha namoyish etildi.

Akademiya rahbariyatining Yevroosiyo guruhining yalpi haftaligi tadbirlarida ishtiroki Akademiyaning xalqaro hamkorligining yanada kengayishiga xizmat qildi.