Ҳуқуқни муҳофаза қилиш академиясида халқаро конференция: рақамли давр чақириқлари юзасидан профессионал мулоқот

2025 йил 19 июнь куни Ўзбекистон Республикаси Ҳуқуқни муҳофаза қилиш академиясида «Рақамли трансформация даврида ҳуқуқни муҳофаза қилиш фаолиятидаги замонавий чақириқлар ва таҳдидлар» мавзусида халқаро илмий-амалий конференция ўз ишини бошлади.

Ушбу конференция 30 дан ортиқ давлатдан келган 100 дан зиёд хорижий экспертларни — етакчи олимлар, амалиётчи мутахассислар, соҳавий ташкилот ва муассасалар вакилларини бирлаштирди. Тадбир доирасида ҳуқуқни муҳофаза қилиш соҳасида тез суръатлар билан кечаётган технологик ўзгаришларни чуқур таҳлил қилишга алоҳида эътибор қаратилди.

Конференция дастури доирасида пленар мажлис ҳамда қуйидаги йўналишларга бағишланган учта асосий параллел сессия ташкил этилди:

• Ҳуқуқни муҳофаза қилиш соҳасида фан ва таълим: замонавий ёндашувлар ва чақириқлар;

• Рақамли криминалистика ва тергов фаолиятини ташкил этишнинг янги усуллари;

• Рақамли даврда коррупция, жиноий даромадларни ювиш ва терроризмни молиялаштиришга қарши курашиш.

Ҳуқуқни муҳофаза қилиш академияси ушбу тадбир ташкилотчиси сифатида замон талабларига мос ҳолда тезкор ва самарали қарор қабул қилиш қобилиятига эга бўлган юқори малакали мутахассисларни тайёрлашга катта эътибор қаратаётганини яна бир бор намоён этди. Халқаро даражадаги экспертлар иштирокида платформа яратилиши — Академиянинг илмий салоҳиятни ривожлантириш, инновацион таълим ёндашувларини жорий этиш ва халқаро ҳамкорликни мустаҳкамлашга қаратилган изчил ҳаракатларининг мантиқий давомидир.

Ушбу конференциянинг ўтказилиши касбий мулоқотни ривожлантиришда муҳим босқич бўлиб, рақамли трансформация шароитида жамоат хавфсизлиги ва ҳуқуқ-тартиботни таъминлашга доир амалий ечимларни ишлаб чиқишга хизмат қилмоқда.