Маҳаллаларда криминоген вазиятни яхшилашга қаратилган ишлар тизимли давом этмоқда

Ҳуқуқни муҳофаза қилиш академияси томонидан Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ПҚ–1-сон қарори ижросини таъминлашга қаратилган ишлар тизимли ва изчил давом эттирилмоқда.

Академия томонидан маҳаллалардаги жиноятчилик вазиятини илмий ёндашув асосида навбатдаги ўрганиш ишлари Тошкент шаҳрининг Миробод туманида олиб борилиб, туманнинг “Минг ўрик”, “Мовароуннахр” ва “Ойбек” маҳаллаларида жиноятчиликни жиловлаш, маҳалла фаолларини жамоат хавфсизлигини мустаҳкамлаш жараёнларига кенг жалб қилишга алоҳида эътибор қаратилмоқда.

Академия ишчи гуруҳининг ҳудуддаги криминоген вазиятнинг кундалик таҳлили асосида ишлаб чиққан хулосалари ва таклифлари маҳаллаларда хавфсиз муҳитни яратиш ва ҳуқуқбузарликларнинг олдини олиш тизими самарадорлигини янада оширишга ижобий ҳисса қўшмоқда.

Туманнинг “қизил” ва “сариқ” тоифага киритилган ҳар бир маҳалласидаги жиноятчилик вазиятига таъсир этувчи омилларни ҳар томонлама таҳлил қилиш натижасида ҳуқуқбузарликларнинг ўзига хос хусусиятлари баҳоланиб, манзилли профилактика тизимини жорий этиш бўйича илмий асосланган таклифлар бериб борилмоқда.

Ҳудудларда мазкур йўналишдаги тизимли ишлар изчил давом эттирилади.