Жамиятда ижтимоий-иқтисодий барқарорликни таъминлашда ҳуқуқни муҳофаза қилиш функцияларини амалга ошириш самарадорлиги муаммолари

Ўзбекистон Республикаси Бош прокуратураси Академияси томонидан Беларусь Республикаси илмий-ўқув муассалари билан имзоланган таълим ва илмий-тадқиқот фаолияти соҳасида ҳамкорлик тўғрисидаги меморандумларни амалга ошириш бўйича ишлар давом этмоқда.

Масалан, Беларусь Республикаси Бош прокуратурасининг Қонунийлик ва ҳуқуқ-тартиботни мустаҳкамлаш илмий-амалий маркази ташаббуси билан ташкиллаштирилган «Жамиятда ижтимоий-иқтисодий барқарорликни таъминлашда ҳуқуқни муҳофаза қилиш функцияларини амалга ошириш самарадорлиги муаммолари» мавзусида халқаро илмий-амалий конференцияда Ўзбекистон Республикаси Бош прокуратураси Академияси иштирок этди.

Мазкур тадбирда Латвия, Литва, Россия, Сербия ва Украина мамлакатларининг прокуратура ходимлари ва олимлари, шунингдек Мустақил Давлатлар Ҳамдўстлиги иштирокчи-давлатларининг Бош прокурорлари Мувофиқлаштирувчи кенгаши, Беларусь Республикаси Бош прокуратураси ва Тергов қўмитаси раҳбарияти иштирок этди.

Ушбу конференцияда Ўзбекистон Республикаси Бош прокуратураси Академиясининг бўлими бошлиғи Б.Каюмов Ўзбекистон Республикаси прокуратура органлари тизимида амалга оширилаётган институционал ўзгаришлар бўйича маъруза қилди.

Шунингдек, ташриф давомида Беларусия давлат университетининг Судьялар, прокуратура, суд ва адлия муассасалари ходимларини қайта тайёрлаш ва малакасини ошириш институти директори В.Годунов билан учрашув бўлиб ўтди.