Жиззах вилояти прокуратура ва ички ишлар органлари ходимлари учун сайёр ўқув ва амалий машғулотлар ташкил этилди

Ҳуқуқни муҳофаза қилиш академиясининг Рақамли криминалистика илмий-тадқиқот институти ходимлари томонидан Жиззах вилоятида “Ахборот технологиялари ёрдамида содир этилган жиноятчилик аҳволи, амалиётдаги муаммолар, бу тоифадаги жиноятларни фош этиш ва тергов қилиш самарадорлигини ошириш” мавзусида сайёр ўқув ва амалий машғулотлар ўтказилди.

Мазкур тадбир Бош прокурорнинг биринчи ўринбосари Б.Валиев раҳбарлигидаги ишчи гуруҳ томонидан Ўзбекистон Республикаси Президентнинг 2025 йил 3 январдаги ПҚ-1-сон қарори ҳамда жорий йилнинг 5 март куни Давлат раҳбари томонидан Коррупцияга қарши курашиш Миллий Кенгашининг йиғилишида тергов сифатини ошириш бўйича берилган топшириқлар ижросини таъминлаш мақсадида Жиззах вилоятида ўтказилган ўқув-амалий семинар доирасида ташкил этилди.

Тадбирда Жиззах вилояти прокуратураси ва ички ишлар органлари масъуллари, туман (шаҳар) прокуратуралари терговчилари ва ёш мутахассислари, Департаментнинг вилоят бошқармаси терговчилари, туман (шаҳар) ИИБ терговчилари, ва бошқа масъул мутахассислар иштирок этишди.

Тадбирда иштирок этган терговчилар ва уларни назорат қилувчи прокурорлар учун кибержиноятларни фош этиш ҳамда тергов қилишда ўтказилиши лозим бўлган экспертиза турлари, рақамли технологиялар ёрдамида содир этилган кибержиноятларни фош этишнинг ўзига хос хусусиятлари ва махсус воситаларни қўллаш услублари, ҳодиса жойини кўздан кечириш, виртуал ҳолда қайта кўриб чиқиш имконини берувчи 360 градусли сферик видеокамераларни қўллаш имкониятлари атрофлича тушунтирилди, Академиянинг Рақамли криминалистика илмий-тадқиқот институти имкониятлари ёритилди.

Шунингдек, Академияда тайёрланган “Ахборот технологиялари соҳасидаги жиноят ишларини юритишда терговчининг ён дафтари” услубий қўлланма мазмун-моҳияти ва уни амалиётда қўллашнинг афзалликлари таништирилди.

Сайёр ўқув-амалий машғулот давомида Рақамли криминалистика илмий-тадқиқот институти томонидан амалиётда фойдаланиб келинаётган рақамли далиллар билан ишлашга мўлжалланган техник ва аппарат дастурий воситалар барча иштирокчиларга таништирилиб, ҳар бирининг техник имкониятлари таништириб ўтилди.

Академия томонидан жойларга чиққан ҳолда ўқув ва амалий машғулотлар ўтказиш давом эттирилади.