Латвияда коррупцияга қарши курашиш йўналишида ёзги мактабда иштирок этилди

Ҳуқуқни муҳофаза қилиш академияси вакили Коррупцияга қарши курашиш агентлиги ходимлари, вазирлик ва идораларнинг комплаенс тузилмалари раҳбарларидан иборат Ўзбекистон Республикаси делегацияси таркибида Латвия давлатида ташкил этилган ёзги мактабда иштирок этди.

Ёзги мактаб Европа Иттифоқи ва Германия Федерал иқтисодий ҳамкорлик ва тараққиёт вазирлиги молиявий кўмагида амалга оширилаётган “Ўзбекистонда давлат бошқарувини такомиллаштириш – инклюзив коррупциянинг олдини олиш” лойиҳаси доирасида ташкил этилди.

Делегация аъзолари Латвия Республикасининг Рига, Лиепая ва Юрмала шаҳарларида бўлиб, у ерда жойлашган Коррупциянинг олдини олиш ва унга қарши курашиш бюроси (KNAB), Давлат назорати, “Давлат кўчмас мол-мулки” давлат акциядорлик жамияти, Давлат чегара назорати органи, Лиепая махсус иқтисодий зонаси, Курземе божхона назорат пункти, Жанубий-Курземе ўлкаси ва Юрмала шаҳрининг ўзини-ўзи бошқариш органлари ҳамда Tranparency International Latvia (DELNA) халқаро ташкилотига ташриф буюришди.

Юқоридаги ташрифларда Латвиянинг давлат органлари ва ташкилотлари ва ҳуқуқни муҳофаза қилиш органлари мутахассислари томонидан иштирокчиларга Латвияда коррупцияга қарши курашиш ва унинг олдини олиш тизими, манфаатлар тўқнашувини бошқариш, ички назорат ва давлат хизматчиларининг даромадларини декларация қилиш тизими, коррупцияга қарши тақиқ ва чекловларни бузганлик учун жавобгарлик чоралари, коррупциянинг олдини олишда ННТ ўрни ҳамда давлат хизматчиларининг малакасини ошириш каби мавзуларда ўқув машғулотлари ўтказилди.

Ёзги мактаб делегация аъзоларига коррупцияга қарши курашиш ва унинг олдини олиш бўйича ривожланган тажрибани жойида чуқурроқ ўрганишга ва келгусида ўз ташкилотларида мазкур механизмлардан фойдаланишга кўмак кўрсатади.