Маҳаллаларда ҳуқуқбузарликлар профилактикасини такомиллаштириш масалалари юзасидан идоралараро йиғилиш ўтказилди

Академия ишчи гуруҳи аъзолари 2025 йил 17 июль куни Ўзбекистон Республикаси Криминология институтида бўлиб ўтган идоралараро йиғилишда игтирок этдилар.

Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ПҚ–1-сонли қарори ижросини таъминлаш мақсадида Қўшма чора-тадбирлар режасини ишлаб чиқишга бағишланган мазкур тадбирда Ҳуқуқни муҳофаза қилиш академияси, ИИВ Ҳуқуқбузарликлар профилактикаси бошқармаси, ИИВ Академияси, Жамоат хавфсизлиги институти ҳамда Тошкент давлат юридик университети вакиллари иштирок этишди.

Тадбирда 2025 йилнинг биринчи ярим йиллигида ПҚ–1-сон қарор асосида амалга оширилган илмий-тадқиқот ва амалий ишлар муҳокама қилинди. Жумладан, маҳаллалардаги криминоген вазият, профилактика субъектлари фаолиятининг ҳолати, ижтимоий хавф омиллари ва уларни бартараф этишда қўлланилаётган ёндашувлар таҳлил этилди.

Тадбирда иштирокчилар томонидан аниқ таклиф ва ташаббуслар билдирилиб, улар асосида жорий йилнинг иккинчи ярим йиллиги учун қарор ижросини таъминлашда давлат органлари, илмий-тадқиқот муассасалари ва олий таълим ташкилотлари ўртасидаги ҳамкорлик асосида амалга ошириладиган Қўшма чора-тадбирлар режаси лойиҳасини шакллантириш бўйича келишувга эришилди.