Кибержиноятларга қарши кураш: Тошкент вилояти прокуратура ва ички ишлар органлари ходимлари учун амалий ўқув машғулоти ташкил этилди

Ўзбекистон Республикаси Ҳуқуқни муҳофаза қилиш академиясининг Рақамли криминалистика илмий-тадқиқот институти ходимлари томонидан Тошкент вилоятида “Ахборот технологиялари ёрдамида содир этилган жиноятчилик аҳволи, амалиётдаги муаммолар, бу тоифадаги жиноятларни фош этиш ва тергов қилиш самарадорлигини ошириш” мавзусида сайёр ўқув-амалий машғулотлар ташкил этилди.

Машғулотларда Тошкент вилояти прокуратураси ва ички ишлар органлари раҳбарлари, туман (шаҳар) прокуратуралари ва ички ишлар бўлимлари терговчилари, ёш мутахассислар ҳамда Иқтисодий жиноятларга қарши курашиш департаменти ходимлари фаол иштирок этишди.

Тадбир доирасида терговчилар ва прокурорлар учун кибержиноятларни фош этиш ҳамда тергов қилишдаги долзарб масалалар, замонавий рақамли технологиялар ҳамда махсус техник воситаларни самарали қўллаш усуллари ҳақида амалий маълумотлар берилди. Жумладан, ҳодиса жойини виртуал ҳолда кўриб чиқиш имконини берадиган 360 градусли сферик видеокамера имкониятлари намойиш этилди.

Шунингдек, иштирокчиларга Академия томонидан ишлаб чиқилган “Ахборот технологиялари соҳасидаги жиноят ишларини юритишда терговчининг ён дафтари” номли амалий қўлланманинг мазмуни ва ундан амалиётда фойдаланиш афзалликлари тушунтирилди.

Машғулотлар давомида рақамли далиллар билан ишлашга мўлжалланган илғор техник ва дастурий воситалар тақдим этилди ва уларнинг ҳар бири бўйича амалий кўникмалар шакллантирилди.

Ҳуқуқни муҳофаза қилиш академияси томонидан жойлардаги тергов органлари учун ўтказиладиган амалий машғулотлар келгусида ҳам изчил равишда давом эттирилади.